کاروباری ہفتے کے چوتھے روز پاکستان سٹاک ایکسچینج میں زبردست تیزی دیکھنے میں آئی، جس کے باعث ہنڈرڈ انڈیکس دو نفسیاتی حدیں عبور کرتے ہوئے 2346 پوائنٹس کے اضافے کے ساتھ 1 لاکھ 16 ہزار 513 پوائنٹس پر ٹریڈ کرتا دیکھا گیا۔یہ نمایاں بہتری ایک روز قبل کی شدید مندی کے برعکس ہے، جب انڈیکس 1379 پوائنٹس کی کمی کے بعد 1 لاکھ 14 ہزار 153 پوائنٹس پر بند ہوا تھا۔ ماہرین کے مطابق، سرمایہ کاروں کا اعتماد بحال ہونے، حکومتی معاشی پالیسیوں اور ممکنہ غیرملکی سرمایہ کاری کی امیدوں نے مارکیٹ پر مثبت اثر ڈالا ہے۔معاشی ماہر عبدالعظیم کے مطابق پاکستان سٹاک مارکیٹ میں بہتری کی اہم وجہ امریکہ کی جانب سے ٹیرف میں اضافے کے فیصلے کو 90 روز کے لیے نافذ نہ کرنا ہے۔ ان کا کہنا ہے کہ دوسری جانب پاکستانی وفد کے امریکہ دورے کی خبروں سے بھی مارکیٹ میں بہتری دیکھی جا رہی ہے۔بدھ کو امریکہ کے ساتھ تجارتی تعلقات کے فروغ اور نئے ٹیرف کے حوالے سے مذاکرات کے لیے اعلٰی سطح کا وفد بھیجنے کا فیصلہ کیا تھا۔ٹاپ لائن سکیورٹیز کے تجزیہ کار معاذ ملا کا کہنا ہے کہ گزشتہ دنوں پاکستان سٹاک ایکسچینج پر شدید دباؤ رہا، کیونکہ امریکی ٹیرف کی وجہ سے غیر یقینی صورتحال تھی جس نے عالمی مالیاتی منڈیوں میں ہلچل مچا دی ہے۔انہوں نے مزید کہا کہ بین الاقوامی سٹاک مارکیٹس میں منفی رجحان کے اثرات مقامی مارکیٹ پر بھی نمایاں رہے، جس کے باعث کاروباری دن کے دوران شدید اتار چڑھاؤ دیکھنے میں آیا۔امریکی صدر ڈونلڈ ٹرمپ نے بین الاقوامی مارکیٹس میں کساد بازاری کے پیش نظر بیش تر ممالک کی درآمدات پر عائد کردہ ٹیرف کو 90 دن تک روک کر دیا تھا، تاہم انہوں نے چینی درآمدات پر ٹیکس میں 125 فیصد اضافہ کر دیا۔