تھائی لینڈ نے جمعرات کو کمبوڈیا کے فوجی اہداف پر فضائی حملے کیے ہیں جبکہ کمبوڈیا نے بھی راکٹ اور توپ خانے سے گولہ باری کی۔خبر رساں ادارے اے ایف پی کے مطابق تھائی لینڈ اور کمبوڈیا کے درمیان سرحدی تنازعے میں دونوں ممالک کے ایک دوسرے پر حملوں میں 9 شہری ہلاک ہوئے ہیں۔سرحد پر واقع ’ایمرلڈ ٹرائینگل‘ نامی علاقے پر دونوں ممالک کے درمیان کئی دہائیوں سے تنازع چلا آ رہا ہے۔جمعرات کو دہائیوں پرانا یہ تنازع اس وقت لڑائی کی شکل اختیار کر گیا جب کمبوڈیا نے تھائی لینڈ پر راکٹ اور آرٹیلری کے شیل برسائے جبکہ تھائی فوج کی جانب سے ایف 16 طیارے حرکت میں لائے گئے۔تھائی لینڈ کی فوج کے نائب ترجمان کا کہنا ہے کہ چھ جنگی طیارے تعینات کیے گئے ہیں جبکہ کمبوڈیا میں دو اہداف کو نشانہ بنایا گیا ہے۔تھائی لینڈ کی فوج کے مطابق سرحد پار حملوں 9 شہری ہلاک جبکہ ایک بچے سمیت 14 افراد زخمی ہوئے ہیں۔دونوں فریقین نے لڑائی شروع کرنے کا الزام ایک دوسرے پر عائد کیا ہے جو تھائی صوبے سورین اور کمبوڈیا کے اوڈرمینچی کے درمیان سرحد پر دو مندروں کے قریب پھوٹ پڑی تھی۔کمبوڈیا کی وزارت دفاع کی ترجمان مالی سوچیتا نے ایک بیان میں کہا کہ اپنی سرزمین کے دفاع کے لیے تعینات کمبوڈیا کی افواج پر حملہ کر کے تھائی فوج نے علاقائی سالمیت کی خلاف ورزی کی ہے۔’جواب میں کمبوڈیا کی افواج نے بین الاقوامی قانون کے تحت اپنے دفاع کا جائز حق استعمال کیا تاکہ تھائی لینڈ کے حملوں کو پسپا کیا جائے اور کمبوڈیا کی خودمختاری اور علاقائی سالمیت کا دفاع کیا جائے۔‘کمبوڈیا کے وزیراعظم ہن مینٹ نے اقوام متحدہ کی سلامتی کونسل کا ہنگامی اجلاس بلانے کی درخواست کی ہے۔دوسری جانب تھائی لینڈ کی فوج نے کمبوڈیا کی افواج پر پہلے فائر کرنے کا الزام عائد کیا ہے اور کہا ہے کہ دو بی ایم 21 راکٹس کے حملے میں 14 افراد زخمی ہوئے ہیں۔چین نے بھی کمبوڈیا اور تھائی لینڈ کے درمیان جھڑپوں پر ’گہری تشویش‘ کا اظہار کرتے ہوئے امید کا اظہار کیا کہ ’دونوں فریقین بات چیت اور مشاورت کے ذریعے مسائل کو مناسب طریقے سے حل کریں گے۔‘