ایران کے صوبے سیستان کے شہر زاہدان میں واقع جوڈیشل کمپلیکس پر دہشت گردوں کے حملے میں 6 افراد جاں بحق جبکہ 13 زخمی ہو گئے۔ سکیورٹی فورسز کی بروقت اور مؤثر جوابی کارروائی میں 3 دہشت گرد بھی ہلاک ہو گئے۔ غیر ملکی میڈیا رپورٹس کے مطابق مسلح حملہ آور جوڈیشل کمپاؤنڈ میں داخل ہو گئے اور ججز کے چیمبرز کو نشانہ بناتے ہوئے اندھا دھند فائرنگ کی۔ حملے کے دوران شدید افراتفری پھیل گئی جبکہ سیکیورٹی فورسز نے فوری طور پر علاقے کو گھیرے میں لے کر جوابی کارروائی شروع کی۔ واقعے کے بعد عدالت کی عمارت کا محاصرہ کر لیا گیا اور سرچ آپریشن کا آغاز کر دیا گیا۔ حکام کے مطابق زخمیوں کو قریبی اسپتالوں میں منتقل کر دیا گیا ہے۔