"میں اتنی قد میں چھوٹی ہوں کہ شادی کے دن 6 انچ کی ہیلز پہنی تاکہ سعود کے برابر نظر آؤں، لیکن اگلے ہی دن انہوں نے کہا تم تو بہت چھوٹی ہو، مجھے دھوکا دے دیا۔" پاکستانی شوبز کی مقبول جوڑی جویریہ سعود اور سعود قاسمی اپنی خوشگوار ازدواجی زندگی اور مزاحیہ انداز کے باعث ہمیشہ مداحوں کی توجہ کا مرکز رہتے ہیں۔ 2005 میں شادی کے بندھن میں بندھنے والی یہ جوڑی اس وقت بھی شوبز میں سرگرم تھی، سعود فلموں کے معروف ہیرو تھے جبکہ جویریہ ڈرامہ انڈسٹری میں اپنی پہچان بنا رہی تھیں۔ حال ہی میں ایک تقریب کے دوران جویریہ سعود نے اپنی حسِ مزاح کا بھرپور مظاہرہ کیا۔ اسٹیج پر آنے کے لیے جب انہیں اینٹ پر کھڑا کیا گیا تو وہ ہنستے ہوئے بولیں کہ "میں 1993 سے اب تک انہی اینٹوں پر کھڑی ہو رہی ہوں۔" اسی دوران انہوں نے شادی کے اگلے دن کا ایک دلچسپ قصہ بھی سنایا، جس میں قد سے متعلق سعود کی مزاحیہ شکایت کا ذکر کیا۔ ان کا یہ بیان سوشل میڈیا پر وائرل ہوگیا، جہاں صارفین نے مختلف ردعمل دیے۔ کسی نے اسے محض ہنسی مذاق سمجھا تو کچھ نے طنز کرتے ہوئے کہا کہ انڈسٹری میں سب ہی اصل سے زیادہ لمبے دکھائی دیتے ہیں۔ یہ واقعہ اس بات کی ایک اور مثال ہے کہ جویریہ سعود اپنی سادہ، بے تکلف اور شوخ طبیعت سے نہ صرف محفل کو خوشگوار بنا دیتی ہیں بلکہ مداحوں کو بھی ہمیشہ مسکرانے پر مجبور کر دیتی ہیں۔