اسلام آباد، پشاور اور چترال سمیت ملک کے مختلف شہروں میں جمعے کی صبح زلزلے کے جھٹکے ریکارڈ کیے گئے جس سے شہریوں میں خوف و ہراس پھیل گیا۔ زلزلہ پیما مرکز کے مطابق زلزلے کی شدت ریکٹر اسکیل پر 5.5 رہی جبکہ اس کا مرکز افغانستان کے ہندوکش پہاڑی سلسلے میں واقع تھا۔ زلزلے کی گہرائی 195 کلومیٹر زیرِ زمین بتائی گئی ہے۔ جھٹکے محسوس ہوتے ہی لوگ خوفزدہ ہو کر گھروں اور دفاتر سے باہر نکل آئے اور کلمہ طیبہ کا ورد کرنے لگے۔ تاہم اب تک کسی جانی یا مالی نقصان کی اطلاع موصول نہیں ہوئی۔ ماہرین کے مطابق ہندوکش کے پہاڑی سلسلے میں زیر زمین تبدیلیاں اکثر خطے کے مختلف حصوں میں زلزلے کا باعث بنتی ہیں، تاہم اس بار شدت درمیانی تھی جس کے باعث بڑے پیمانے پر نقصان سے محفوظ رہا گیا۔