امریکی صدر ڈونلڈ ٹرمپ نے اسرائیل کے مغربی کنارے کو ضم کرنے کے منصوبے کو مسترد کرتے ہوئے واضح کیا ہے کہ وہ کسی صورت اس کی اجازت نہیں دیں گے۔ وائٹ ہاؤس کے اوول آفس میں صحافیوں سے گفتگو کرتے ہوئے صدر ٹرمپ نے کہا کہ اب بہت ہو چکا ہے یہ سلسلہ رکنا چاہیے میں اسرائیل کو مغربی کنارہ ضم کرنے کی اجازت نہیں دوں گا۔ انہوں نے بتایا کہ اس حوالے سے اسرائیلی وزیراعظم بنیامین نیتن یاہو سے بھی براہ راست بات ہو چکی ہے۔ امریکی میڈیا رپورٹس کے مطابق صدر ٹرمپ نے اقوام متحدہ کی جنرل اسمبلی کے اجلاس کے موقع پر عرب رہنماؤں کو بھی یقین دہانی کرائی کہ وہ اسرائیل کے انضمامی منصوبے کے مخالف ہیں۔ رپورٹس کے مطابق اسرائیلی حکام نے حالیہ دنوں میں عندیہ دیا تھا کہ حکومت مغربی کنارے کے کچھ حصوں پر کنٹرول حاصل کرنے کے اقدامات کر سکتی ہے تاہم ٹرمپ نے واضح کر دیا کہ ایسا کسی صورت نہیں ہوگا کیونکہ یہ خطے کے امن و استحکام کے لیے خطرناک ہے۔ امریکی خصوصی ایلچی برائے مشرق وسطیٰ اسٹیو وٹکوف نے بھی کہا کہ صدر ٹرمپ کی مسلم رہنماؤں سے ملاقات مثبت رہی ہے اور توقع ہے کہ غزہ میں جاری جنگ کے خاتمے کی کوششوں میں جلد پیش رفت ہوگی۔