امریکا اور اقوامِ متحدہ کی سلامتی کونسل نے شام کے صدر احمد الشراع اور وزیر داخلہ انس خطاب پر عائد تمام اقتصادی و سفری پابندیاں ختم کرنے کا فیصلہ کر لیا۔ عالمی خبر ایجنسی کے مطابق امریکی محکمہ خزانہ نے جمعہ کے روز شامی صدر کا نام عالمی دہشت گردوں کی فہرست سے نکال دیا جب کہ اقوامِ متحدہ کی سلامتی کونسل نے بھی شام کے صدر اور وزیر داخلہ کے نام داعش اور القاعدہ کی پابندیوں کی فہرست سے خارج کر دیے۔ رپورٹ کے مطابق سلامتی کونسل کے اجلاس میں پاکستان نے امریکا کی پیش کردہ قرارداد کی حمایت کی۔اس قرارداد کے حق میں 14 ووٹ آئے جبکہ کسی ملک نے مخالفت نہیں کی، چین نے رائے شماری میں حصہ نہیں لیا۔ اقوامِ متحدہ میں امریکی سفیر مائیک والٹز نے قرارداد کی منظوری کو ایک مضبوط سیاسی پیغام قرار دیا اور کہا کہ یہ فیصلہ ظاہر کرتا ہے کہ شام اب ایک نئے دور میں داخل ہو چکا ہے۔ ان کے مطابق شامی قیادت سے پابندیاں ہٹانے سے شامی عوام کو بحالی اور ترقی کے مواقع حاصل ہوں گے۔اقوامِ متحدہ میں پاکستان کے مستقل مندوب عاصم افتخار احمد نے بھی اس قرارداد کا خیرمقدم کرتے ہوئے کہا کہ یہ اقدام شام کے استحکام اور خطے میں امن کے لیے ایک مثبت قدم ہے۔ واضح رہے کہ یہ فیصلہ ایسے موقع پر سامنے آیا ہے جب شامی صدر احمد الشراع اور امریکی صدر ڈونلڈ ٹرمپ کے درمیان اگلے ہفتے اہم ملاقات متوقع ہے، جسے خطے میں نئی سفارتی پیش رفت کے طور پر دیکھا جا رہا ہے۔