وزیراعظم شہباز شریف نے چیف جسٹس آف پاکستان جسٹس یحییٰ آفریدی سے ملاقات کی جس میں وزیراعظم نے چیف جسٹس کو لاپتا افراد سے متعلق مؤثر اقدامات میں تیزی لانے کی یقین دہانی کرائی۔ وزیراعظم نے چیف جسٹس کو ذمہ داریاں سنبھالنے پر مبارکباد دی اور نیک خواہشات کا اظہار کیا، ملاقات میں ملکی معاشی صورتحال اور سیکیورٹی چیلنجز پر بھی گفتگو کی گئی۔ سپریم کورٹ آف پاکستان سے جاری ہونے والے اعلامیہ کے مطابق وزیراعظم شہباز شریف نے چیف جسٹس ہاؤس میں جسٹس یحییٰ آفریدی سے ملاقات کی، جس میں وزیرقانون اعظم نذیر تارڑ، مشیر احمد چیمہ اور اٹارنی جنرل منصور عثمان اعوان بھی موجود تھے۔اعلامیہ میں بتایا گیا کہ وزیراعظم کی ملاقات چیف جسٹس کی ریفارمز ایجنڈے کا حصہ ہے، چیف جسٹس نے عدالتی پالیسی ساز کمیٹی اجلاس کے ایجنڈا بھیج کر تجاویز مانگی تھیں۔اعلامیہ کے مطابق ملاقات میں رجسٹرار سپریم کورٹ اور سیکریٹری لا اینڈ جسٹس کمیشن بھی شریک ہوئیں جب کہ چیف جسٹس کی جانب سے وزیراعظم کو اعزازی شیلڈ بھی پیش کی گئی۔وزیراعظم نے چیف جسٹس کو ذمہ داریاں سنبھالنے پر مبارکباد دی اور نیک خواہشات کا اظہار کیا، ملاقات میں ملکی معاشی صورتحال اور سیکیورٹی چیلنجز پر بھی گفتگو کی گئی۔چیف جسٹس نے وزیراعظم سے گفتگو کے دوران کہا کہ عدالتی پالیسی سازی پر اپوزیشن کو بھی اعتماد میں لوں گا، اپوزیشن سے بھی تجاویز لیں گے تاکہ اصلاحات غیرمتنازع اور پائیدار ہوں۔چیف جسٹس نے وزیراعظم کی جانب سے نظام انصاف کی بہتری کے لیے کی گئی گفتگو کا خیرمقدم کیا اور وزیراعظم سے نظام انصاف میں بہتری لانے کیلئے تجاویز مانگیں۔وزیراعظم نے چیف جسٹس کو لاپتا افراد سے متعلق مؤثر اقدامات میں تیزی لانے کی یقین دہانی کروائی جب کہ وزیراعظم نے چیف جسٹس سے ان کیسز میں میرٹ پر جلدی فیصلوں کی استدعا کی۔شہباز شریف نے چیف جسٹس کو مختلف عدالتوں میں زیر التوا ٹیکس تنازعات سے متعلق آگاہ کیا اور چیف جسٹس کے انصاف کی بروقت فراہمی کے لیے اسٹیک ہولڈرزسے مشاورت کے اقدام کو سراہا۔