پنجاب اور خیبر پختونخوا کے مختلف شہروں میں طویل عرصے بعد تیز بارش ہوئی، بارش سے آزاد کشمیر کے علاقے نکیال میں طویل عرصے بعد خشک سالی کا خاتمہ ہوگیا ہے۔ بدھ کی رات لاہور ، فیصل آباد،گوجرانوالہ،گجرات،حافظ آباد سمیت پنجاب کے مختلف شہروں میں کہیں ہلکی اور کہیں تیز بارش دیکھنے میں آئی، راولپنڈی اور اس کے نواحی علاقوں میں تقریباً 4ماہ بعد تیز بارش ہوئی ہے۔محکمہ موسمیات کے مطابق بوکرہ میں 19، ایچ ایٹ میں 22، شمس آباد میں 20،چکلالہ میں 18 ملی میٹر بارش ریکارڈ کی گئی۔محکمہ موسمیات نے راولپنڈی اور اسلام آباد میں مزید 3 دن کی تیز بارش کی پیش گوئی کی ہے ، دوسری جانب مری اور گلیات میں رات سے برفباری جاری ہے جس کے باعث سیرکے لیے آنے والوں کی تعداد میں بھی اضافہ ہوگیا ہے۔محکمہ موسمیات نے آج بھی اسلام آباد، بالائی پنجاب،خیبرپختونخوا، کشمیر اورگلگت بلتستان میں اکثر مقامات پر بارش اور پہاڑوں پر برفباری کا امکان ظاہر کیا ہے، اس کے علاوہ خطہ پوٹھوہار اور شمال مشرقی پنجاب میں چند مقامات پر ژالہ باری بھی ہو سکتی ہے۔دوسری جانب خیبر پختونخوا کے مختلف علاقوں میں بھی بادل برسے جبکہ کوہ سفید پر برف باری بھی ہوئی جس سے سردی میں اضافہ ہوگیا، پشاور، دیر، خیبر، مظفر آباد ، اٹھمقام میں بارش سے ٹھنڈ پھر بڑھ گئی۔اس کے علاوہ آزاد کشمیر کے علاقے نکیال میں طویل عرصے بعد خشک سالی کا خاتمہ ہوگیا ہے، محکمہ موسمیات نے بالائی وادی نیلم میں بھی ہلکی برفباری اور بارشوں کا سلسلہ آج بھی جاری رہنے کی پیش گوئی کی گئی ہے۔