پاکستانی اداکار منیب بٹ شادیوں میں کھانا ضائع کرنے والے مہمانوں پر برس پڑے۔ منیب بٹ اپنے حالیہ وی لاگ میں شادی میں شرکت کرنے والے مہمانوں سے خفا اور نالاں نظر آئے۔اداکار کے تازہ وی لاگ سے ایک مختصر سی ویڈیو سوشل میڈیا پر وائرل ہو گئی ہے جس میں انہیں شادی میں مدعو مہمانوں کی جانب سے کھانے کی پلیٹ بھرنے اور بعد ازاں اسے ختم نہ کرنے پر غصے کا اظہار کرتے دیکھا جا سکتا ہے۔منیب نے اپنے وی لاگ میں ٹیبل پر رکھی پلیٹوں کی جانب اشارہ کرتے ہوئے کہا کہ میں نے تین بار کچن کا دورہ کیا ہے، شادیوں پر کھانا کبھی بھی ختم نہیں ہوتا ہے جب تک کے مہمان اسے ضائع نہ کریں۔ان کا بچے ہوئے کھانے سے بھری ہوئی پلیٹوں کو کیمرے پر دکھاتے ہوئے کہنا تھا کہ یہ سارا کھانا ضائع ہو گیا ہے۔ویڈیو میں اداکار مہمانوں کی جانب سے اس لاپرواہی پر لاجواب اور افسوس کرتے نظر آ رہے ہیں۔دوسری جانب اس وائرل ویڈیو کے کمنٹ باکس میں منیب بٹ کے مداح، فالوورز و انٹرنیٹ صارفین اپنی اپنی رائے کا اظہار کر رہے ہیں۔صارفین کا کہنا ہے کہ منیب بٹ نے اپنے وی لاگ میں مثبت بات کر کے معاشرے کی اصلاح کی کوشش کی ہے۔واضح رہے کہ حال ہی میں منیب بٹ کے برادر نسبتی معاذ خان کی شادی ہوئی ہے اور مذکورہ ویڈیو اسی کی ایک تقریب میں بنائی گئی ہے۔