بلوچستان کے ضلع خضدار میں ایک دل دہلا دینے والا واقعہ پیش آیا جہاں معصوم بچوں کی اسکول بس کو دہشتگردی کا نشانہ بنایا گیا۔ اس حملے میں تین بچوں سمیت پانچ افراد جاں بحق ہوئے، جب کہ متعدد طلبا زخمی بھی ہوئے ہیں۔ آئی ایس پی آر کے مطابق یہ ہولناک منصوبہ بندی بھارت میں کی گئی، جہاں سے پاکستان دشمن عناصر کو اس کارروائی کے لیے مدد فراہم کی گئی۔ پاکستان کی عسکری قیادت کا کہنا ہے کہ میدانِ جنگ میں ناکامی کے بعد بھارت اب بلوچستان اور خیبرپختونخوا میں دہشتگردوں کے ذریعے اپنے مذموم عزائم کو پروان چڑھانے کی کوشش کر رہا ہے۔ پاک فوج کے ترجمان نے کہا کہ بھارت کی ریاستی پالیسی کے طور پر دہشتگردی کو فروغ دینا نہ صرف عالمی قوانین کی کھلی خلاف ورزی ہے بلکہ اخلاقی گراوٹ کی واضح مثال بھی ہے۔ انہوں نے واضح کیا کہ خضدار میں ہونے والی دہشتگردی کے ذمہ دار نہ صرف اپنے انجام کو پہنچیں گے بلکہ ان کے سہولت کار بھی قانون کے شکنجے میں آئیں گے۔ آئی ایس پی آر کا یہ بھی کہنا ہے کہ بھارت کی دہشتگردی پر مبنی پراکسی حکمت عملی کو دنیا کے سامنے بے نقاب کیا جائے گا، اور معصوم جانوں کے خون کا حساب ضرور لیا جائے گا۔