صدر پاکستان آصف علی زرداری نےروس کے 35 ویں قومی دن پر صدر ولادیمیر پوٹن، روسی سفیر اور روس کے عوام کو مبارکباد پیش کرتے ہوئے کہا ہے کہ پاکستان روس کے ساتھ قومی دن کی خوشیوں میں شریک ہے۔ پاک روس تعلقات باہمی احترام، تعاون، اور مختلف شعبوں میں مشترکہ مفادات کی بنیاد پر گزشتہ برسوں میں بہتر ہوئے ہیں۔ تفصیلات کے مطابق روس کے 35 ویں قومی دن کے موقع پر خطاب کرتے ہوئے کہا کہ حال ہی میں دونوں ممالک کے درمیان اعلیٰ سطحی روابط بڑھے ہیں۔اعلٰی سطحی روابط نے پاکستان اور روس کے درمیان گہرے تعلق اور تفہیم کی بنیاد رکھی ہے، پاکستان اور روس علاقائی اور عالمی پلیٹ فارمز پر بھی قریبی تعاون جاری رکھے ہوئے ہیں۔پاکستان روس کو ایک اہم عالمی طاقت سمجھتا ہے، روس یوریشین خطے میں علاقائی امن و استحکام یقینی بنانے میں کلیدی کردار ادا کر رہا ہے۔انہوں نے مزید کہا کہ وزیراعظم کے معاون خصوصی  طارق فاطمی کی ماسکو میں روسی وزیر خارجہ کے ساتھ ایک انتہائی امید افزا ملاقات ہوئی۔ملاقات میں فریقین نے خطے میں امن و استحکام کی اہمیت پر زور دیا۔پاکستان اور روس کے درمیان دوستی کے رشتے مزید مضبوط ہوں گے،ہمارے پاس تجارت، سرمایہ کاری، ٹیکنالوجی، اور عوامی روابط میں شراکت داری کو وسعت دینے کی بے پناہ صلاحیت موجود ہے۔آئیے ہم پاکستان اور روس کے درمیان تفہیم اور تعاون بڑھانے کے عزم کی تجدید کریں۔پاکستان روس دوستی زندہ باد۔۔!