لبنان کے ایک سرحدی شہر میں شادی کی خوشی اس وقت ایک غیر متوقع منظر میں بدل گئی جب ایرانی میزائل اسرائیل کی طرف جاتے ہوئے آسمان کو چیرتے دکھائی دیے۔ یہ واقعہ اس وقت پیش آیا جب لبنانی شہر میں ایک شادی کی تقریب جاری تھی۔ سوشل میڈیا پر وائرل ہونے والی ویڈیو میں دیکھا جا سکتا ہے کہ مہمانوں نے نہ صرف میزائلوں کو دیکھا بلکہ بعض افراد نے اس لمحے کو اپنے موبائل فونز میں بھی قید کر لیا۔ ویڈیو میں واضح ہے کہ کچھ مہمان میزائلوں کو دیکھ کر خوشی کا اظہار کرتے ہیں اور رقص بھی کرتے نظر آتے ہیں، حالانکہ یہ منظر علاقے کی عمومی صورتحال کی سنگینی کی یاد دہانی بھی تھا۔ لبنانی شہر اسرائیل کے بارڈر کے قریب واقع ہے جہاں سے ایرانی میزائلوں کا گزرنا باآسانی دیکھا جا سکتا تھا۔ Lebanese family celebrating a wedding as Iranian missiles pass overhead to Israel last Night pic.twitter.com/Jhj5HdC50k— Ryan Rozbiani (@RyanRozbiani) June 15, 2025 دوسری جانب ایران گزشتہ تین دنوں میں اسرائیل پر درجنوں میزائل برسا چکا ہے، جن کے نتیجے میں اسرائیلی میڈیا کے مطابق اب تک 8 افراد جان سے جا چکے ہیں جبکہ تقریباً 100 افراد زخمی ہو کر اسپتالوں میں زیر علاج ہیں۔ ایران نے یہ حملے اسرائیل کے گزشتہ حملوں کے جواب میں کیے ہیں، جس سے خطے میں کشیدگی مسلسل بڑھ رہی ہے۔