پنجاب میں الیکٹرک گاڑیوں کو شناخت دینے کے لیے بڑا قدم اُٹھا لیا گیا۔ محکمہ ایکسائز موٹر برانچ نے الیکٹرک وہیکلز کے لیے مخصوص سبز رنگ کی نمبر پلیٹ جاری کر دی۔ ایڈیشنل ڈی جی ایکسائز کے مطابق الیکٹرک گاڑیوں کی پہچان کے لیے یہ منفرد ڈیزائن متعارف کرایا گیا ہے۔ ایڈیشنل ڈی جی کا کہنا ہے کہ الیکٹرک وہیکلز کے مالکان نئی سبز پلیٹس لگانے کے پابند ہوں گے، تاکہ ان گاڑیوں کی فوری شناخت ممکن ہو سکے۔ پنجاب بھر میں اب تک 16 ہزار سے زائد الیکٹرک گاڑیاں، موٹر سائیکلز، بسیں اور رکشے رجسٹر ہو چکے ہیں۔پنجاب بھر میں 14,500 سے زائد الیکٹرک موٹرسائیکلز،1,461 الیکٹرک کاریں،31 بسیں،36 رکشے رجسٹر ہیں۔ایڈیشنل ڈی جی نے مزید بتایا کہ الیکٹرک گاڑیوں کی رجسٹریشن اور ٹوکن ٹیکس پر 95 فیصد رعایت دی جا رہی ہے، جو اگلے مالی سال میں بھی برقرار رہے گی۔ یہ اقدام نہ صرف ماحول دوست ٹرانسپورٹ کی حوصلہ افزائی کرے گا بلکہ مستقبل میں ای وی کلچر کے فروغ میں بھی معاون ثابت ہوگا۔