وفاقی حکومت کی جانب سے پیٹرولیم مصنوعات کی قیمتوں میں اضافے کے بعد ٹرانسپورٹرز نے سخت ردعمل دیتے ہوئے اجلاس طلب کرلیا۔ سابق رکن سندھ اسمبلی صدر پاکستان گڈز ٹرانسپورٹ الائنس ملک شہزاد اعوان کا کہنا ہے کہ ڈیزل کی فی لیٹر قیمت میں 11 روپے 37 پیسے اور پیٹرول کی قیمت میں 5 روپے 36 پیسے اضافے کو مسترد کرتے ہیں۔ حکومت نے ایک دفعہ پھر ٹرانسپورٹرز اور عوام کی جیبوں پر ڈاکہ مارا ہے۔ ٹول ٹیکس، پیٹرول کی قیمتوں میں اضافہ اور ایف بی آر کے نئے قوانین کو مسترد کرتے ہیں۔ حکومت کے ظالمانہ اقدامات صرف ٹرانسپورٹرز کو ہی نہیں ملک کی تمام انڈسٹری کو تباہ کردیں گے۔ ملک شہزاد اعوان کا کہنا ہے کہ حکومت کے خلاف پورے پاکستان کی ٹرانسپورٹ تنظیموں کو ایک پیج پر لارہا ہوں۔ ٹرانسپورٹ برادری سخت اقدامات اٹھانے کو تیار ہے۔ انہوں نے کہا کہ ہم کاروباری حضرات اپنے زور پر حکومت کو یہ تمام فیصلے واپس لینے پر مجبور کرنے کی طاقت رکھتے ہیں۔ حکومت نے ہمیں مجبور کردیا ہے کہ ہم ملک گیر ہڑتال کردیں۔