سابق گورنر بلوچستان، سابق وفاقی وزیر اور سابق رکن قومی اسمبلی لیفٹیننٹ جنرل (ریٹائرڈ) عبدالقادر بلوچ نے پاکستان پیپلز پارٹی کی بنیادی رکنیت سے باضابطہ طور پر استعفیٰ دے دیا۔ انہوں نے یہ فیصلہ مشاورت اور غور و فکر کے بعد اپنے قریبی سیاسی رفقاء اور دوستوں سے تبادلہ خیال کے بعد کیا، وہ اب پارٹی سیاست سے مکمل طور پر کنارہ کش ہوچکے ہیں۔ لیفٹیننٹ جنرل (ر) عبدالقادر بلوچ اب کسی بھی سیاسی سرگرمی یا وابستگی میں دلچسپی نہیں رکھتے تاہم وہ اپنے سیاسی ساتھیوں کو مشورہ دیتے ہیں کہ وہ پارٹی کے اندر اپنی سیاسی سرگرمیاں اور خدمات حسب سابق جاری رکھیں۔ انہوں نے ان تمام افراد کا شکریہ ادا کیا ہے جنہوں نے ان کے طویل سیاسی سفر میں ان کا ساتھ دیا۔ وہ اس کے بعد بھی پاکستان کی خدمت ذاتی حیثیت میں جاری رکھیں گے۔