خیبر پختونخوا حکومت نے سرکاری اہلکاروں کو رہائشی کوارٹرز کی الاٹمنٹ میں بے قاعدگیوں اور بدعنوانی کے خلاف سخت اقدامات اٹھاتے ہوئے محکمہ انتظامیہ سے تفصیلات طلب کرلی ہیں جبکہ تمام اہل ملازمین کی فہرست ویب سائٹ پر جاری کرنے کی بھی ہدایت کردی گئی ہے۔ وزیر اعلیٰ کے مشیر برائے بدعنوانی بریگیڈیئر محمد مسددق عباسی نے ایک خط میں سرکاری رہائش کی الاٹمنٹ سے متعلق شکایات کو سنجیدگی سے لیتے ہوئے فوری کارروائی کا حکم دیا ہے۔ سیکریٹری نے انتظامیہ کو خط میں لکھا ہے کہ اسٹیٹ آفس کی جانب سے سرکاری اہلکاروں کے لیے رہائشی کوارٹرز کی الاٹمنٹ کے حوالے سے ایک سے زیادہ ویٹنگ لسٹ کو برقرار رکھا گیا ہے جس کی وجہ سے اہلکاروں کو شدید مشکلات کا سامنا ہے۔ مشیر برائے بدعنوانی نے انتظامیہ محکمہ کو ہدایت دی ہے کہ وہ سرکاری اہلکاروں کی بنیادی پے اسکیل کی بنیاد پر ویٹنگ لسٹ اہلکاروں کی درجہ بندی سے متعلق پالیسی اور سرکاری ویٹنگ لسٹ کو 24 جولائی 2025 تک فراہم کرے اسی طرح سرکاری ویٹنگ لسٹ کو انتظامیہ محکمہ کی ویب سائٹ پر 24 جولائی تک اپ لوڈ کی جائے اور اسے ہر مہینے کی پہلی ہفتے میں اپ ڈیٹ کیا جائے۔رہائشی کوارٹرز کی الاٹمنٹ صرف ویب سائٹ پر اپ لوڈ شدہ ویٹنگ لسٹ کے مطابق کی جائے۔ مشیر بدعنوانی نے ہدایت کی ہے کہ رعایتی بنیادوں پر کیسز کو سیکریٹری انتظامیہ کی سربراہی میں ایک کمیٹی کے ذریعے حل کیا جائے جس کی میٹنگ ہر تین ماہ بعد منعقد ہو جبکہ ملازمین کی شکایات کو گریونسز ریڈرسل کمیٹی کے ذریعے حل کیا جائے، جو ہر مہینے کے آخری ہفتے میں میٹنگ کرے۔ خط میں مزید کہا گیا ہے کہ ان ہدایات پر عملدرآمد کو یقینی بنایا جائے اور بدعنوانی کے خلاف صفر رواداری کی پالیسی کو سختی سے نافذ کیا جائے۔