لوئر چترال میں موسلادھار بارشوں کے بعد برساتی نالوں میں طغیانی آ گئی، کلدام گول میں شدید سیلابی ریلے کے باعث دروش تا چترال مرکزی شاہراہ کو ہر قسم کی ٹریفک کے لیے بند کر دیا گیا۔ مقامی انتظامیہ کے مطابق شدید بارش کے بعد کلدام گول برساتی نالے میں پانی کی سطح میں مسلسل اضافہ ہو رہا ہے، جس کے نتیجے میں سڑک پر پانی اور ملبہ جمع ہو گیا ہے۔ حفاظتی اقدامات کے تحت ٹریفک کو فوری طور پر روک دیا گیا ہے تاکہ کسی بھی ناخوشگوار واقعے سے بچا جا سکے۔ ضلعی انتظامیہ، ریسکیو ٹیمیں اور محکمہ مواصلات کی ٹیمیں موقع پر موجود ہیں اور صورتحال پر نظر رکھے ہوئے ہیں۔ مقامی لوگوں کو محتاط رہنے اور غیر ضروری سفر سے گریز کرنے کی ہدایت جاری کر دی گئی ہے۔ محکمہ موسمیات کے مطابق، بارشوں کا سلسلہ آئندہ چند روز تک جاری رہنے کا امکان ہے جس کے باعث مزید لینڈ سلائیڈنگ یا سیلابی صورتحال پیدا ہو سکتی ہے۔