محکمہ مال خیبر پختونخوا میں اسامیاں نا ہونےکے باوجود تحصیلداروں کی ترقیاں اور تعیناتیاں تو کر دی گئیں تاہم اب ان کی تنخواہوں کی ادائیگی ایک بڑا مسئلہ بن گئی ہے۔ بورڈ آف ریونیو نے ڈپٹی کمشنرز کو ہدایت کی ہے کہ تحصیلداروں کی تنخواہیں دیگر محکموں کی خالی اسامیوں سے ادا کی جائیں۔ ذرائع کے مطابق بڑی تعداد میں گرداوروں کو ترقی دے کر تحصیلدار تعینات کر دیا گیا ہے جس کے باعث تنخواہوں کی ادائیگی کا بحران پیدا ہو گیا ہے۔ بورڈ آف ریونیو کی جانب سے جاری اعلامیہ کے مطابق اسکیل 16 کے عبدالکریم کو تحصیلدار سروس ڈیلوری سینٹر نوشہرہ، اسکیل 14 کے نائب تحصیلدار کو خوازہ خیلہ سوات، اسداللہ کو بابوزئی سوات اور راجہ سعد احمد کو ہوتی مردان سرکل میں تعینات کیا گیا ہے۔ اعلامیہ کے مطابق ڈپٹی کمشنر نوشہرہ سے کہا گیا ہے کہ عبدالکریم کی تنخواہ کسی بھی محکمہ کی اسکیل 16 کی خالی اسامی سے ادا کی جائے جبکہ ڈپٹی کمشنر سوات سے کہا گیا ہے کہ نائب تحصیلدار کی تنخواہ اسکیل 14 کی کسی بھی خالی اسامی سے دی جائے۔ ذرائع کے مطابق بورڈ آف ریونیو نے تحصیلداروں کی تعیناتی اور ترقی تو کردی ہے تاہم ان کے پاس منظور شدہ اسامیاں کم ہیں اور اسامیوں کی تعداد سے زیادہ تعیناتیاں اور ترقیاں کی گئی ہیں جس کے باعث اب تنخواہوں کی ادائیگی میں مشکلات درپیش ہیں۔