حکومت خیبرپختونخوا نے مالی بحران کا شکار صوبے کے اعلیٰ تعلیمی اداروں کے لیے اہم اقدام کرتے ہوئے جامعات کے ملازمین کی تنخواہوں اور پنشن کی ادائیگی کیلئے 5 ارب 22 کروڑ روپے کے فنڈز جاری کر دیے ہیں۔ محکمہ خزانہ خیبرپختونخوا کی جانب سے جاری کردہ اعلامیہ کے مطابق اس رقم میں سے 3 ارب 60 کروڑ روپے پنشنرز کی واجبات کی ادائیگی کیلئے مختص کیے گئے ہیں۔ واضح رہے کہ صوبے کی کئی یونیورسٹیاں گزشتہ کئی ہفتوں سے شدید مالی بحران کا شکار تھیں جس کے باعث اساتذہ، ملازمین اور پنشنرز تنخواہوں اور پنشن کی عدم ادائیگی پر سراپا احتجاج تھے۔ صوبائی وزیر برائے اعلیٰ تعلیم مینا خان آفریدی نے اس حوالے سے کہا ہے کہ موجودہ حکومت تعلیمی نظام کی بہتری کے لیے بھرپور اقدامات کر رہی ہے اور جامعات کو مالی خودمختاری دینے کے لیے جامع حکمت عملی تیار کی جا رہی ہے۔ دوسری جانب یونیورسٹی آف سائنس اینڈ ٹیکنالوجی بنوں کی سینیٹ نے صوبائی حکومت کی جانب سے جاری کردہ فنڈز کا خیرمقدم کرتے ہوئے اجلاس میں باقاعدہ قرارداد منظور کی ہے۔