انٹرنیشنل کرکٹ کونسل (آئی سی سی) نے ٹی20 کرکٹ کی تازہ رینکنگ جاری کردی ہے۔پاکستانی کھلاڑیوں نے ویسٹ انڈیز کے خلاف حالیہ ٹی 20 سیریز میں شاندار کارکردگی کے بعد ٹی 20 انٹرنیشنل رینکنگ میں نمایاں ترقی حاصل کی ہے۔آئی سی سی کے مطابق مڈل آرڈر بیٹر حسن نواز 24 درجے بہتری حاصل کر کے 30 ویں، صائم ایوب 25 درجے ترقی کے ساتھ 37 ویں اور صاحبزادہ فرحان 34 درجے بہتری کے ساتھ 63 ویں نمبر پر آ گئے ہیں۔اسی طرح سے کپتان سلمان علی آغا 15 درجے بہتری کے ساتھ 76 ویں اور تجربہ کار بیٹر فخر زمان تین درجے ترقی کے ساتھ 78 ویں نمبر پر آ گئے ہیں۔دوسری جانب سینئر کھلاڑی بابر اعظم اور محمد رضوان 2024 سے ٹی 20 کرکٹ نہ کھیل پانے کہ وجہ سے تین تین درجے تنزلی کے بعد بالترتیب 17ویں اور 19ویں پوزیشن پر آگئے ہیں۔وکٹ کیپر و بیٹر محمد حارث جو دورہ ویسٹ انڈیز میں متاثر کن کارکردگی نہ دکھا سکے، 21 درجے تنزلی کے بعد 86 ویں پوزیشن پر چلے گئے ہیں۔آئی سی سی کی نئی درجہ بندی میں انڈیا کے ابھیشک شرما بیٹنگ میں پہلے نمبر پر ہیں جبکہ آسٹریلیا کے ٹریوس ہیڈ دوسرے اور انڈیا کے تلک ورما تیسرے نمبر پر موجود ہیں۔بولنگ رینکنگ میں کوئی بھی پاکستانی کھلاڑی ٹاپ 20 میں جگہ نہیں بنا سکا تاہم فاسٹ بولر حارث رؤف بدستور 26 ویں نمبر پر موجود ہیں جبکہ عباس آفریدی تین درجے تنزلی کے ساتھ 27 ویں پوزیشن پر آ گئے ہیں۔بائیں بازو کے سپنر سفیان مقیم نے شاندار کارکردگی کا مظاہرہ کرتے ہوئے 69 درجے ترقی کے بعد 34 ویں پوزیشن حاصل کی ہے جبکہ شاہین شاہ آفریدی ایک درجہ نیچے آ کر 36ویں اور محمد نواز 51 درجے بہتری کے بعد 56ویں پوزیشن پر پہنچ گئے ہیں۔ سپنر سفیان مقیم نے شاندار کارکردگی کا مظاہرہ کرتے ہوئے 69 درجے ترقی کے بعد 34 ویں پوزیشن حاصل کی(فوٹو: اے ایف پی)ابرار احمد نو درجے تنزلی کے بعد 60ویں اور ٹی20 نائب کپتان شاداب خان پانچ درجے تنزلی کے بعد 72ویں پوزیشن پر آ گئے ہیں۔بولنگ رینکنگ میں نیوزی لینڈ کے جیکب ڈفی پہلے، انگلینڈ کے عادل رشید دوسرے اور ویسٹ انڈیز کے اکیل حسین تیسرے نمبر پر ہیں۔آل راؤنڈر رینکنگ میں صائم ایوب نے 70 درجے ترقی کر کہ 24ویں اور محمد نواز 13 درجے بہتری کے ساتھ 36ویں پوزیشن حاصل کی جبکہ عباس آفریدی چار درجے تنزلی کے بعد 56ویں نمبر پر آ گئے ہیں۔اسی طرح سے افتخار احمد چھ درجے تنزلی کے بعد 70ویں اور فہیم اشرف پانچ درجے ترقی کے بعد 77ویں نمبر پر ہیں۔آل راؤنڈر کیٹیگری میں انڈیا کے ہاردک پانڈیا پہلے، نیپال کے دیپیندرا سنگھ ایری دوسرے اور افغانستان کے محمد نبی تیسرے نمبر پر موجود ہیں۔