انڈین فضائیہ کے سربراہ نے دعویٰ کیا ہے کہ مئی میں ہونے والی جھڑپوں کے دوران انڈیا نے پاکستان کے پانچ لڑاکا طیارے اور ایک سرویلنس فوجی طیارہ مار گرایا تھا۔انڈین ایئر چیف مارشل امر پریت سنگھ کا یہ بیان ایک ایسے وقت میں سامنے آیا ہے جب انڈیا اور پاکستان کے درمیان رواں برس مئی میں پیدا ہونے والی جنگی صورتحال کو تقریباً تین ماہ مکمل ہونے والے ہیں۔پاکستان کی جانب سے انڈیا کے اس دعوے پر ابھی تک کوئی ردعمل سامنے نہیں آیا ہے۔خبر رساں ایجنسی روئٹرز کے مطابق انڈین شہر بنگلورو میں ایک تقریب سے خطاب کرتے ہوئے انڈین فضائیہ کے سربراہ ایئر چیف مارشل امر پریت سنگھ نے کہا کہ ’بیشتر پاکستانی طیارے روسی ساختہ ایس۔ 400 زمین سے فضا میں مار کرنے والے میزائل نظام کے ذریعے نشانہ بنائے گئے۔‘ان کے ’مطابق اس دعوے کی تصدیق الیکٹرانک ٹریکنگ ڈیٹا سے کی گئی ہے۔‘انہوں نے کہا کہ ’ہمارے پاس کم از کم پانچ لڑاکا طیاروں کے مار گرائے جانے کی تصدیق ہے، جبکہ ایک بڑا طیارہ بھی نشانہ بنایا گیا، جس کے بارے میں خیال ہے کہ وہ ایک جاسوس طیارہ تھا، اسے 300 کلومیٹر کے فاصلے سے گرایا گیا۔‘انہوں نے مزید کہا کہ ’یہ زمین سے فضا میں مار کرنے والے ہتھیار کی مدد سے نشانہ بنایا گیا اب تک کا سب سے بڑا ریکارڈ شدہ نشانہ ہے۔‘دوسری جانب پاکستان نے کشیدگی کے پہلے دن دعویٰ کیا تھا کہ اس نے فضائی لڑائی میں انڈیا کے پانچ طیارے مار گرائے۔ انڈین فوج کے ایک جنرل نے مئی کے آخر میں کہا تھا کہ انہوں نے فضائی لڑائی میں نقصان اٹھانے کے بعد حکمت عملی تبدیل کی اور تین دن بعد جنگ بندی کا اعلان ہونے سے پہلے سبقت حاصل کی۔اس وقت انڈیا نے یہ بھی دعویٰ کیا تھا کہ اس نے پاکستان کے ’چند طیارے‘ مار گرائے تھے تاہم اسلام آباد نے طیاروں کے کسی نقصان کی تردید کی تھی لیکن تسلیم کیا کہ لڑائی کے دوران اس کے فضائی اڈوں کو نقصان پہنچا۔گزشتہ ماہ امریکہ کے صدر ڈونلڈ ٹرمپ نے کہا تھا کہ انڈیا اور پاکستان کے درمیان حالیہ تنازعے کے دوران پانچ لڑاکا طیارے مار گرائے گئے تھے جبکہ مئی میں انڈیا میں بھارتیہ جنتا پارٹی (بی جے پی) کے رہنما اور سابق وزیر قانون سبرامینن سوامی نے کہا تھا کہ حالیہ کشیدگی میں پاکستان نے انڈیا کے پانچ جنگی طیارے گرائے۔یہ پہلا موقع تھا جب حکمران جماعت میں سے کسی نے اعتراف کیا تھا کہ پاکستان نے انڈیا کے طیارے گرائے ہیں۔