
چیئرمین پیپلز پارٹی بلاول بھٹو زرداری نے وفاقی حکومت سے فوری طور پر نیا نیشنل فنانس کمیشن (این ایف سی) ایوارڈ جاری کرنے اور صوبوں کو ان کا آئینی حق دینے کا مطالبہ کرتے ہوئے کہا ہے کہ ہر پانچ سال بعد این ایف سی ایوارڈ جاری ہونا آئینی تقاضا ہے مگر وفاقی حکومت اپنی ناکامیوں کا بوجھ صوبوں پر ڈال رہی ہے۔
حیدرآباد میں پارک کے افتتاح اور میڈیا سے گفتگو میں بلاول بھٹو نے کہا کہ 18ویں ترمیم کے تحت صوبوں کو ذمہ داریاں تو مل گئیں مگر وسائل نہیں دیے گئے۔ ایف بی آر کی ٹیکس وصولی میں ناکامی صوبوں کا قصور نہیں، یہ مکمل طور پر وفاقی حکومت اور اس کے اداروں کی ناکامی ہے۔ انہوں نے واضح کیا کہ 27ویں آئینی ترمیم کے حوالے سے حکومت یا کسی جماعت نے پیپلز پارٹی سے رابطہ نہیں کیا یہ محض میڈیا کی باتیں ہیں۔
کالعدم بی ایل اے اور مجید بریگیڈ کو امریکا کی جانب سے عالمی دہشت گرد قرار دیے جانے کو پاکستان کے مؤقف کی بڑی کامیابی قرار دیتے ہوئے بلاول بھٹو نے کہا کہ یہ دونوں گروہ نہ صرف پاکستانی عوام اور مزدوروں کو نشانہ بناتے ہیں بلکہ کھلے عام مودی سرکار کا ساتھ دینے کا اعلان بھی کر چکے ہیں۔ انہوں نے اعلان کیا کہ کوشش کریں گے کہ اقوام متحدہ سے بھی ان پر پابندی لگوائی جائے۔
بھارت پر تنقید کرتے ہوئے انہوں نے کہا کہ مودی حکومت سندھ طاس معاہدے کے باوجود دریائے سندھ کا پانی روکنے کی کوشش کر رہی ہے مگر اسے پاکستان کے حصے کا پانی دینا ہی پڑے گا۔ پانی ہماری زندگی ہے اس پر ہر شہری کو متحد ہو کر آواز اٹھانی چاہیے۔ ساتھ ہی انہوں نے پانی کے تحفظ کے لیے ڈریپ ایریگیشن اور جدید زرعی ٹیکنالوجی اپنانے کی ضرورت پر زور دیا۔
بلاول بھٹو نے کہا کہ پہلی بار حیدرآباد میں ترقی کی رفتار تیز ہوئی ہے، رنگ روڈ سمیت بڑے منصوبے جاری ہیں۔ پیپلز پارٹی نے سندھ میں سب سے زیادہ تعلیمی ادارے، اسپتال اور جامعات قائم کی ہیں اور موجودہ معاشی حالات کے باوجود ہر ضلع میں یونیورسٹی بنانے کا عزم رکھتی ہے۔
انہوں نے سندھ پیپلز ہاؤسنگ منصوبے کو شفاف اور کرپشن فری قرار دیتے ہوئے کہا کہ لاکھوں خاندانوں کو گھر فراہم کیے جا رہے ہیں ۔
انہوں نے کہا کہ عوام نے پیپلز پارٹی کو مینڈیٹ دیا ہے اور ہم پر لازم ہے کہ انہیں زیادہ سے زیادہ سہولتیں فراہم کریں۔ میئر حیدرآباد اور ان کی ٹیم کو خراج تحسین پیش کرتے ہوئے انہوں نے کہا کہ آئندہ دو برس میں مزید ترقیاتی منصوبے مکمل ہوں گے اور صاف پانی کی فراہمی میں نمایاں بہتری آئے گی۔