حکومت بلوچستان نے گلگت بلتستان اور خیبر پختونخوا کے سیلاب متاثرہ خاندانوں کے لیے امدادی سامان کی بڑی کھیپ روانہ کردی۔ ترجمان بلوچستان حکومت شاہد رند کے مطابق وزیر اعلیٰ بلوچستان میر سرفراز بگٹی کی خصوصی ہدایت پر یہ امدادی سامان متاثرہ صوبوں کے عوام کی فوری ضروریات کو مدنظر رکھتے ہوئے بھیجا گیا ہے۔ امدادی کھیپ میں بنیادی ضرورت کی اشیاء اور نان فوڈ آئٹمز شامل ہیں جو متاثرہ خاندانوں میں تقسیم کیے جائیں گے۔ شاہد رند کے مطابق گلگت بلتستان کے 1500 اور خیبر پختونخوا کے 1000 متاثرہ خاندانوں کے لیے سامان روانہ کیا گیا ہے۔ اس موقع پر ترجمان بلوچستان حکومت اور ڈائریکٹر جنرل پی ڈی ایم اے بلوچستان جہانزیب خان نے امدادی سامان متاثرہ علاقوں کی جانب روانہ کیا۔ ترجمان نے کہا کہ بلوچستان حکومت مشکل کی اس گھڑی میں متاثرہ صوبوں کے عوام کے ساتھ کھڑی ہے، سیلاب متاثرہ بھائیوں کی مدد دراصل انسانی ہمدردی اور یکجہتی کا عملی اظہار ہے۔ ڈائریکٹر جنرل پی ڈی ایم اے جہانزیب خان نے کہا کہ امدادی سامان اعلیٰ معیار کا ہے اور متاثرین کی فوری ضروریات کو مدنظر رکھتے ہوئے تیار کیا گیا ہے۔ ہر ریلیف آئٹم کو معیاری پیمانوں کے مطابق جانچا گیا ہے تاکہ متاثرین کو حقیقی سہولت مل سکے۔ وزیر اعلیٰ بلوچستان میر سرفراز بگٹی نے اپنے پیغام میں کہا کہ سیلاب متاثرین کی ہر ممکن مدد حکومت بلوچستان کی اولین ترجیح ہے اور متاثرہ خاندانوں کو ہرگز اکیلا نہیں چھوڑا جائے گا۔