بانی پی ٹی آئی عمران خان نے پشتونخوا ملی عوامی پارٹی کے سربراہ محمود خان اچکزئی کو قومی اسمبلی میں اپوزیشن لیڈر کے طور پر نامزد کر دیا ہے، جب کہ سینیٹ میں اپوزیشن لیڈر کے لیے اعظم سواتی کو نامزد کیا گیا ہے۔ عمران خان نے اڈیالہ جیل میں ملاقات کے لیے آنے والے رہنماؤں کو اس فیصلے سے آگاہ کیا۔ اس موقع پر عمران خان نے پارٹی کی آئندہ حکمت عملی اور ضمنی انتخابات کے حوالے سے فیصلے پارٹی کی سیاسی کمیٹی پر چھوڑ دیے ہیں جس کا اجلاس آج شام متوقع ہے۔ واضح کہ 9 مئی کے مقدمات میں انسداد دہشت گردی عدالت سے سزا کے بعد پی ٹی آئی رہنما عمر ایوب قومی اسمبلی میں اپوزیشن لیڈر کے عہدے سے ہٹا دیے گئے تھے۔ الیکشن کمیشن نے عدالت کے فیصلے کے بعد عمر ایوب اور شبلی فراز کی نااہلی کا نوٹیفکیشن بھی جاری کیا تھا جس کے خلاف دونوں رہنماؤں نے پشاور ہائی کورٹ سے رجوع کر رکھا ہے۔