خیبر پختونخوا حکومت نے موسمیاتی تبدیلیوں سے متعلق پالیسی سازی اور عملی اقدامات کے لیے خود مختار کلائمیٹ ایکشن بورڈ کے قیام کا فیصلہ کیا ہے۔ اس حوالے سے قانونی مسودہ خیبر پختونخوا اسمبلی میں پیش کیا جائے گا، صوبائی سطح پر قائم ہونے والا کلائمیٹ ایکشن بورڈ مکمل آزادی اور خود مختاری کے ساتھ فیصلے کرے گا۔ خیبر پختونخوا حکومت کی جانب سے قائم کیے جانے والے بورڈ میں 8 انتظامی سیکریٹری اور نجی شعبے سے تعلق رکھنے والے 4 افراد شامل ہوں گے۔ کلائمیٹ ایکشن بورڈ کا مینڈیٹ موسمیاتی تبدیلیوں کے حوالے سے پالیسی تیار کرنا، مختلف محکموں کے ساتھ روابط قائم رکھنا اور تحقیق کے علاوہ بین الاقوامی اداروں سے تعاون بڑھانا ہوگا۔ مسودے میں مزید بتایا گیا ہے کہ بورڈ نئے موسمیاتی پالیسی فریم ورک کو مرتب کرنے کے ساتھ ساتھ کاربن کریڈٹ کے حصول کے لیے اقدامات کرے گا جبکہ گرین ہاؤس گیسز کی فہرست کی تیاری اور کم کاربن معیشت کو فروغ دینا بھی اس کے مقاصد میں شامل ہے۔ قانونی مسودے کے مطابق ہر چار ماہ بعد کلائمیٹ ایکشن بورڈ کا اجلاس لازمی طور پر منعقد ہوگا تاکہ موسمیاتی تبدیلیوں سے متعلق عملی اقدامات اور پالیسیوں پر پیشرفت کا جائزہ لیا جاسکے۔