بیجنگ : وزیرِ اعظم محمد شہباز شریف نے کوئٹہ میں بلوچستان نیشنل پارٹی کے جلسے میں ہونے والے دھماکے کی شدید الفاظ میں مذمت کی ہے۔ وزیرِ اعظم نے واقعے میں قیمتی جانوں کے ضیاع پر گہرے دکھ اور رنج کا اظہار کرتے ہوئے شہداء کے اہل خانہ سے تعزیت اور زخمیوں کی جلد صحتیابی کے لیے دعا کی۔ وزیرِ اعظم نے حکام کو ہدایت کی کہ زخمیوں کو بہترین طبی سہولیات فراہم کی جائیں اور واقعے میں ملوث افراد کی فوری نشاندہی کرکے انہیں قرار واقعی سزا دلائی جائے۔ اپنے بیان میں وزیرِ اعظم نے کہا کہ سیاسی جلسے پر حملہ بلوچستان میں دہشتگردوں کی انتشار پھیلانے کی گھناؤنی سازش کا منہ بولتا ثبوت ہے۔ انہوں نے واضح کیا کہ دہشتگرد بلوچستان کے امن اور ترقی کے دشمن ہیں اور ان کے مذموم عزائم کو کسی صورت کامیاب نہیں ہونے دیا جائے گا۔ وزیرِ اعظم شہباز شریف نے کہا کہ دہشتگردی کی عفریت کے مکمل خاتمے تک اس کے خلاف جنگ جاری رہے گی۔ انہوں نے معصوم اور نہتے شہریوں پر دہشتگرد حملوں کو بزدلانہ اور قابلِ مذمت قرار دیا۔