وفاقی وزیر داخلہ محسن نقوی کی زیر صدارت سی ڈی اے ہیڈکوارٹر میں اجلاس منعقد ہوا جس میں فیڈرل کانسٹیبلری ہیڈکوارٹر کو پشاور سے اسلام آباد منتقل کرنے کا اصولی فیصلہ کیا گیا ہے۔
اجلاس میں وزیر مملکت برائے داخلہ طلال چوہدری، وفاقی سیکرٹری داخلہ، کمانڈنٹ اور ڈپٹی کمانڈنٹ فیڈرل کانسٹیبلری، چیئرمین سی ڈی اے، آئی جی اسلام آباد پولیس، ڈپٹی کمشنر اسلام آباد اور دیگر سینئر حکام نے شرکت کی۔
اجلاس میں وفاقی وزیر داخلہ نے ہدایت دی کہ فیڈرل کانسٹیبلری کے نئے ہیڈکوارٹر کے لیے دارالحکومت میں موزوں اراضی فوری طور پر مختص کی جائے اور اس سلسلے میں ماسٹر پلان بھی تیار کیا جائے۔ انہوں نے کہا کہ زمین کی مختص کرتے وقت ہیڈکوارٹر اور ٹریننگ کی ضروریات کو خصوصی طور پر دیکھاجائے تاکہ فورس کو جدید سہولیات فراہم کی جا سکیں۔
محسن نقوی نے کہا کہ فیڈرل کانسٹیبلری کو جدید بنیادوں پر استوار کرکے ایک منظم اور فعال فورس بنایا جائے گا اور فورس کی پیشہ ورانہ صلاحیتوں میں اضافے کے لیے تمام ممکنہ اقدامات کیے جائیں گے۔