فیلڈ مارشل سید عاصم منیر نے کہا ہے کہ ریاست ہر سال قیمتی جانوں اور املاک کے نقصان کی متحمل نہیں ہو سکتی متاثرین سیلاب کی دوبارہ آبادکاری اور بحالی میں پاک فوج مکمل تعاون کرے گی۔ پاک فوج کے شعبہ تعلقات عامہ کے مطابق فیلڈ مارشل سید عاصم منیر نے قصور سیکٹر اور جلالپور پیروالا، ملتان میں قائم فلڈ ریلیف کیمپس کا دورہ کیا۔ اس موقع پر چیف سیکرٹری پنجاب اور سول انتظامیہ کے اعلیٰ حکام بھی ان کے ہمراہ تھے۔ انہیں سیلاب کی موجودہ صورتحال اور جاری ریسکیو و ریلیف سرگرمیوں پر بریفنگ دی گئی۔ ترجمان پاک فوج کے مطابق سول انتظامیہ سے گفتگو کرتے ہوئے فیلڈ مارشل سید عاصم منیر نے اچھی طرز حکمرانی اور عوام دوست ترقی کی اہمیت پر زور دیا۔ دورے کے دوران فیلڈ مارشل نے متاثرین سیلاب سے ملاقات کی۔ متاثرین نے بروقت انخلا اور امداد پر پاک فوج کا شکریہ ادا کیا جس پر فیلڈ مارشل نے انہیں مکمل بحالی اور دوبارہ آبادکاری میں ہر ممکن تعاون کی یقین دہانی کرائی۔ اس موقع پر انہوں نے ریلیف آپریشنز میں مصروف پاک فوج کے جوانوں، ریسکیو 1122 کے اہلکاروں اور پولیس سے بھی ملاقات کی اور ان کے حوصلے، تیاری اور مشکل حالات میں قوم کی خدمت کے جذبے کو سراہا۔ ترجمان کے مطابق فیلڈ مارشل سید عاصم منیر نے لاہور، قصور اور ملتان جلالپور پیروالا کے سیلاب متاثرہ علاقوں کا فضائی جائزہ بھی لیا تاکہ نقصان کے تخمینے اور بحالی کے اقدامات کا براہِ راست معائنہ کیا جا سکے۔