پاکستان انٹرنیشنل ایئرلائنز نے رواں ماہ پاکستان سے کینیڈا کے لیے اپنی پروازیں عارضی طور پر معطل کر دی ہیں۔ ایئرلائن کے مطابق یہ فیصلہ خصوصی بوئنگ 777 لانگ رینج طیاروں کی شیڈولڈ میٹیننس کے باعث کیا گیا ہے۔
ترجمان پی آئی اے کے مطابق یہ جدید طیارے بحرِ اوقیانوس کو بغیر کسی اسٹاپ کے 17 گھنٹے تک پرواز کرنے کی صلاحیت رکھتے ہیں۔ دونوں طیاروں کو تین ہفتوں کے لیے تکنیکی معائنے اور پرزوں کی تبدیلی کے عمل سے گزارا جا رہا ہے جو ہر دس سال بعد لازمی ہوتا ہے۔
ترجمان کا کہنا ہے کہ یہ اقدام آئندہ مہینوں میں متوقع مسافروں کے رش سے قبل فضائی بیڑے کو مکمل طور پر فعال اور محفوظ بنانے کے لیے اٹھایا گیا ہے تاکہ بین الاقوامی معیار کے مطابق بہترین سہولیات فراہم کی جا سکیں۔