پاکستانی فیشن انڈسٹری کی معروف ماڈل اور اداکارہ فیا خان، جو صوفیہ خان کے نام سے بھی جانی جاتی ہیں، ایک بار پھر مشکل وقت سے گزر رہی ہیں۔ فیا خان نے اپنے کیریئر میں بڑے بڑے ڈیزائنرز کے ساتھ ریمپ واکس کیں، شوٹس اور مہمات کا حصہ بنیں اور اپنی خوبصورتی اور اعتماد بھری شخصیت سے مداحوں کے دل جیتے۔ وہ ہمیشہ بے باک رہی ہیں اور اپنی زندگی کے تجربات کو فالوورز کے ساتھ کھل کر شیئر کرتی ہیں۔ حالیہ دنوں میں فیا خان نے انسٹاگرام پر مداحوں کو یہ اطلاع دی کہ ان کی دوسری شادی بھی طلاق پر ختم ہو گئی ہے۔ ان کی پہلی شادی ڈائریکٹر قاسم علی مرید سے ہوئی تھی، مگر یہ رشتہ زیادہ دیر نہ چل سکا اور دونوں میں علیحدگی ہوگئی۔ اس شادی سے ان کی دو بیٹیاں ہیں۔ بعدازاں، فیا نے جرمنی میں مقیم ترک شہری ٹوگلا ایرکن سے شادی کی تھی جس سے ان کی ایک بیٹی ہوئی، مگر بدقسمتی سے یہ رشتہ بھی ٹوٹ گیا۔ فیا خان نے انسٹاگرام پر مداحوں کو بتایا کہ وہ دوسری بار طلاق کے مرحلے سے گزری ہیں لیکن پھر بھی وہ ہمت کے ساتھ اپنی زندگی گزار رہی ہیں۔ انہوں نے کہا کہ وہ اس بات پر خوش نصیب ہیں کہ اللہ نے انہیں تین بیٹیوں کی ماں بنایا ہے اور اپنے خاندان کے لیے دعاؤں کی درخواست کی۔ ایک سوال و جواب کے سیشن میں فیا خان نے مداحوں کے ساتھ مزید بات چیت بھی کی۔ جب ان سے پوچھا گیا کہ رشتے میں سب سے بڑی خرابی یا ریڈ فلیگ کیا ہو سکتی ہے تو انہوں نے جواب دیا کہ اگر عزت نہ ہو تو وہ سب سے بڑی کمی ہے۔ ایک مداح نے کہا کہ وہ اپنے شوہر کے ساتھ اچھی لگتی ہیں، اس پر فیا کا کہنا تھا کہ قسمت اللہ کے ہاتھ میں ہے۔ انہوں نے یہ بھی واضح کیا کہ اس وقت اسلامی طلاق ہو چکی ہے، تاہم کاغذی کارروائی میں وقت لگے گا۔ فیا خان کی یہ خبر ان کے چاہنے والوں کے لیے یقیناً افسوسناک ہے مگر ماڈل نے ایک مضبوط عورت کی طرح خود کو ثابت کیا ہے اور اپنی تینوں بیٹیوں کے ساتھ آگے بڑھنے کا عزم ظاہر کیا ہے۔