اسلام آباد کے سب سے ہائی وولٹیج اغواء کیس میں اہم پیش رفت سامنے آئی ہے۔ کیس کی مدعیہ ٹک ٹاکر سامعہ حجاب بالآخر عدالت میں پیش ہوگئیں۔ عدالت سے باہر آتے ہی میڈیا نمائندگان نے سامعہ حجاب کو گھیر لیا اور تیز و تند سوالات کی بوچھاڑ کر دی۔ رپورٹرز نے بار بار یہ سوال دہرایا: میڈم، کتنے میں ڈیل ہوئی ہے؟ تاہم سامعہ حجاب نے کسی بھی سوال کا جواب دینے سے گریز کیا اور مکمل خاموشی اختیار کیے رکھی۔ ذرائع کے مطابق سامعہ حجاب اور ملزم حسن زاہد کے درمیان پسِ پردہ معاملات طے پانے کی اطلاعات ہیں۔ باخبر ذرائع کا دعویٰ ہے کہ سامعہ حجاب نے راضی نامے کے بدلے کم از کم ڈیڑھ کروڑ روپے کا مطالبہ کیا تھا جبکہ مبینہ طور پر 75 لاکھ روپے کی رقم وصول بھی کرلی گئی ہے۔ ادھر عدالت میں کیس کی مزید سماعت جاری ہے جبکہ مدعیہ کی خاموشی اور میڈیا کے سوالات سے گریز نے معاملے کو مزید پیچیدہ بنا دیا ہے۔