"ڈاکٹرز کے مطابق عمر کو الٹی ہوئی جو پھیپھڑوں میں چلی گئی، آکسیجن کا نظام متاثر ہوا اور دل کے اچانک بند ہونے سے وہ ہم سب کو چھوڑ گئے۔" یہ الفاظ ٹی وی میزبان وسیم بادامی کے ہیں، جو اپنے قریبی ساتھی اور رمضان ٹرانسمیشن کے ننھے ستارے عمر شاہ کے اچانک انتقال پر افسوس کا اظہار کر رہے تھے۔ ڈیرہ اسماعیل خان سے آنے والی اس خبر نے سوشل میڈیا کو غمگین کر دیا۔ احمد شاہ، جو اپنی معصومیت اور شرارتوں سے پاکستانیوں کے دل جیت چکے ہیں، انسٹاگرام پر یہ صدمہ خیز اطلاع دیتے ہوئے لکھتے ہیں کہ "ہمارے خاندان کا ننھا چمکتا ستارہ اللہ کے حضور واپس لوٹ گیا ہے۔" عمر، جو اکثر اپنے بھائیوں کے ساتھ مارننگ شوز اور تفریحی پروگرامز میں نظر آتے تھے، اچانک دنیا سے رخصت ہو گئے۔ صبح فجر کے وقت یہ المناک سانحہ پیش آیا۔ وسیم بادامی نے ایک ویڈیو پیغام میں بتایا کہ یہ موت کسی حادثے یا طویل بیماری کی وجہ سے نہیں بلکہ اچانک پیش آنے والے کارڈیو ویسکیولر اریسٹ کی وجہ سے ہوئی۔ ان کا کہنا تھا کہ رمضان کی محفلوں کی جان سمجھے جانے والے عمر کی یاد ہمیشہ زندہ رہے گی اور ہمیں ان کے اہلِ خانہ کے لیے دعا کرنی چاہیے۔ عمر کے انتقال نے صرف ان کے مداحوں کو نہیں بلکہ شوبز کی مشہور شخصیات کو بھی لرزا دیا۔ فہد مصطفیٰ نے انسٹاگرام پر غم اور یقین نہ آنے کے جذبات کا اظہار کیا، جبکہ نجی چینل کے سی ای او جرجیس سیجا نے عمر کے ساتھ لی گئی یادگار تصویر شیئر کرتے ہوئے اس صدمے کو ناقابلِ برداشت قرار دیا۔ معروف ولاگر محمد شیراز نے بھی دل گرفتہ انداز میں کہا کہ کچھ دوست خاندان جیسے ہوتے ہیں، اور عمر کی جدائی نے انہیں ایسے ہی احساس میں مبتلا کر دیا جیسے ان کا اپنا حصہ کھو گیا ہو۔ View this post on Instagram A post shared by Muhammad Shiraz (@shirazivlogs) ننھے احمد شاہ کی مسکراہٹ سے شہرت پانے والا یہ خاندان ایک بڑے صدمے سے گزر رہا ہے۔ عمر شاہ کی اچانک موت نے نہ صرف ان کے گھر والوں کو بلکہ ملک بھر کے مداحوں کو سوگوار کر دیا ہے، اور ہر کوئی یہی دعا کر رہا ہے کہ اللہ ان کے اہلِ خانہ کو صبرِ جمیل عطا فرمائے۔