پاکستان کے وزیراعظم شہباز شریف نے کہا ہے کہ ’جب تک فلسطین کے مقبوضہ علاقے اور انڈیا کے زیرتسلط مقبوضہ جموں و کشمیر کے عوام کو سلامتی کونسل کی قراردادوں کے مطابق حقِ خودارادیت نہیں دیا جاتا، مستقل امن ایک خواب ہی رہے گا۔‘وزیراعظم ہاؤس سے اتوار کو جاری کردہ بیان کے مطابق یہ بات وزیراعظم شہباز شریف نے عالمی یومِ امن کے موقعے پر اپنے پیغام میں کہی ہے۔انہوں نے کہا کہ ’پاکستان کو فخر ہے کہ اس نے عالمی امن کے قیام میں بھرپور کردار ادا کیا ہے۔ پائیدار امن اس وقت تک ممکن نہیں جب تک تنازعات کی بنیادیں ختم نہ کی جائیں۔‘وزیراعظم کا کہنا تھا کہ ’یہ دن ہمیں سنجیدہ انداز میں اس امر کی یاددہانی کراتا ہے کہ امن کے فروغ کے لیے ہر فرد اور ہر قوم کو اپنا انفرادی اور اجتماعی کردار ادا کرنا ہو گا۔‘انہوں نے کہا کہ امن کو مضبوط بین الاقوامی اداروں کے ذریعے پروان چڑھانا اور محفوظ رکھنا ہو گا۔ عالمی برادری کو چاہیے کہ وہ اقوامِ متحدہ کے چارٹر کے مطابق پرامن ذرائع سے تنازعات کے حل کے عزم کو ایک بار پھر پختہ کرے۔‘’اقوامِ متحدہ کے امن مشنز میں دہائیوں پر محیط شمولیت اور متاثرہ آبادیوں کو انسانی ہمدردی کی بنیاد پر امداد فراہم کرنا پاکستان کی اُن کاوشوں کا حصہ ہے جن سے دنیا کے تنازع زدہ خطوں میں امن و استحکام کو فروغ ملا۔‘وزیراعظم نے کہا کہ ’آئیے اس عالمی یومِ امن پر ہم سب تعمیری اور اجتماعی عمل کا عہد کریں۔ ان ہتھیاروں کو خاموش کریں جو بے گناہوں کی جان لیتے ہیں، سفارت کاری پر دوبارہ اعتماد کریں اور تنازعات کو پرامن ذرائع سے حل کریں۔‘