پاکستان تحریک انصاف کے بانی عمران خان سے گزشتہ روز ملاقات کے بعد اڈیالہ جیل کے باہر میڈیا سے گفتگو کرتے ہوئے علیمہ خان نے انکشاف کیا ہے کہ علی امین گنڈاپور نے چیئرمین پی ٹی آئی سے ان کے بارے میں تین باتیں کی ہیں۔ میڈیا سے گفتگو کرتے ہوئے انہوں نے کہاکہ علی امین گنڈاپور نے عمران خان کو بتایا کہ میں ایجنسیوں سے رابطے میں ہوں، سارا سوشل میڈیا میرے کنٹرول میں ہے اور پارٹی چیئرمین بننا چاہتی ہوں۔ علیمہ خان نے ان بیانات کو مکمل طور پر بے بنیاد قرار دیتے ہوئے کہا کہ اس طرح کے پروپیگنڈے کا مقصد صرف اور صرف پارٹی کے اندر انتشار پیدا کرنا ہے۔انہوں نے مزید کہا کہ تحریک انصاف کے کارکنوں اور قیادت کو ان سازشوں میں الجھنے کے بجائے بانی چیئرمین عمران خان کی رہائی اور پارٹی کی مضبوطی پر توجہ دینی چاہیے۔ واضح رہے کہ وزیراعلیٰ خیبرپختونخوا علی امین گنڈاپور کی گزشتہ روز عمران خان سے اڈیالہ جیل میں ملاقات ہوئی تھی جس کے بعد بانی عمران خان نے اپنی بہن علیمہ خان کو پارٹی امور میں مداخلت سے روک دیا۔