اسکردو میں انسداد پولیو مہم کے دوران اس وقت دلچسپ صورتحال پیدا ہوگئی جب بچے کو پولیو قطرے پلانے سے انکاری باپ کو اسسٹنٹ کمشنر نے قطرے پلا دیئے۔ ڈسٹرکٹ ہیلتھ آفیسر کے مطابق انسداد پولیو مہم کے دوران ضلع بھر میں 38 ہزار بچوں کو پولیو سے بچاؤ کے قطرے پلائے گئے۔ جس میں مقامی لوگوں کا تعاون حوصلہ افزا رہا۔ تاہم اسکردو میں ضلع گانچھے کے شہری نے اپنے 5 سالہ بیٹے کو پولیو قطرے پلانے سے انکار کیا جس پر اسسٹنٹ کمشنر نے بچے کے ساتھ اس کے باپ کو بھی پولیو سے بچاؤ کے قطرے پلا دیئے۔ ضلعی انتظامیہ کے مطابق بچے کے والد کو ویکسین کے بے ضرر ہونے کا یقین دلانے کے لیے اسے قطرے پلائے گئے۔ بچے کے والد کا کہنا تھا کہ بیٹے کو پولیو سے بچاؤ کے قطرے نہ پلانا اس کی غلطی تھی جسے وہ تسلیم کرتا ہے۔