ایم کیو ایم پاکستان کی رکن قومی اسمبلی ڈاکٹر نکہت شکیل آن لائن فراڈ کا شکار ہوگئیں۔ نوسرباز نے رکن قومی اسمبلی نکہت شکیل کو کال کرکے پی ایم ڈی سی کے نمائندے کے طور پر خود کو متعارف کرایا اور ادارے کی دستاویزات کا پارسل پہنچانے کے لیے ان سے کوڈ مانگا۔ رکن قومی اسمبلی نکہت شکیل کے مطابق جوں ہی انہوں نے کوڈ شیئر کیا، ان کا واٹس ایپ اکاؤنٹ ہیک ہوگیا۔ بعدازاں نوسرباز نے ان کے رشتے داروں اور دوستوں سے رقم بھی بٹور لی۔ نکہت شکیل کے مطابق جن افراد نے رقم دینے سے قبل ان سے تصدیق کی وہ بچ گئے، لیکن کچھ نے رقم بھیج دی۔ رکن قومی اسمبلی ڈاکٹر نکہت شکیل نے کہا کہ نوسرباز کالر کو پی ایم ڈی سی کی دستاویزات سے متعلق علم ہونا بھی سوالیہ نشان ہے۔