برطانوی شاہی خاندان کے رکن پرنس اینڈریو نے اعلان کیا ہے کہ وہ اپنے تمام شاہی اعزازات اور خطابات سے دستبردار ہو رہے ہیں جن میں ان کی والدہ ملکہ الزبتھ دوم کی جانب سے دیا گیا ڈیوک آف یارک کا لقب بھی شامل ہے۔ پرنس اینڈریو کے مطابق یہ فیصلہ انہوں نے بادشاہ چارلس سے تفصیلی مشاورت کے بعد کیا۔ ان کا کہنا تھا کہ وہ اب بھی بطور پرنس جانے جائیں گے تاہم مستقبل میں وہ اپنے کسی بھی شاہی خطاب یا لقب کا استعمال نہیں کریں گے۔ شہزادہ اینڈریو نے مزید کہا کہ انہوں نے رائل وکٹورین آرڈر کے نائٹ گرینڈ کراس اور دی موسٹ نوبل آرڈر آف دی گارٹر کے اعزازات بھی واپس کر دیے ہیں۔ اس طرح ان کے پاس اب صرف پیدائش کے ساتھ ملا لقب پرنس ہی باقی رہے گا۔ برطانوی میڈیا کے مطابق شہزادہ اینڈریو کی سابقہ اہلیہ سارہ فرگوسن نے بھی شاہی القابات استعمال نہ کرنے کا فیصلہ کیا ہے تاہم ان کی بیٹیاں شہزادی بیٹریس اور شہزادی یوجینی بدستور اپنے شاہی القابات برقرار رکھیں گی۔ شہزادہ اینڈریو نے یہ قدم اس وقت اٹھایا جب وہ امریکی کاروباری شخصیت جیفری ایپسٹین سے تعلقات کے باعث ایک طویل عرصے سے تنقید اور تنازعات کی زد میں تھے۔ جن کی انہوں نے ایک بار پھر سختی سے تردید کی ہے۔