راولپنڈی میں نان بائیوں نے روٹی اور نان کی قیمتوں میں ازخود اضافہ کر دیا، ضلعی انتظامیہ قیمتیں کنٹرول کرنے میں مکمل طور پر ناکام دکھائی دے رہی ہے۔ شہر بھر میں خمیری روٹی کی قیمت 25 روپے سے بڑھا کر 30 روپے اور سادہ نان 30 روپے سے بڑھا کر 35 روپے کر دیا گیا ہے، جبکہ روغنی نان اور پراٹھے کی قیمت میں 10 روپے اضافہ کرتے ہوئے نئی قیمت 60 روپے مقرر کردی گئی ہے۔ نان بائیوں کا کہنا ہے کہ آٹا مہنگا ملنے کے باعث قیمتوں میں اضافہ کرنا پڑا ہے۔ ان کے مطابق آٹے کی 20 کلو بوری جو پہلے 6500 روپے میں ملتی تھی، اب 12 ہزار روپے تک پہنچ چکی ہے۔ ایک نان بائی نے کہا، ”جب آٹا مہنگا خرید رہے ہیں تو سستی روٹی کیسے بیچ سکتے ہیں؟ حکومت ہمیں آٹا سستا فراہم کرے تو روٹی کی قیمت کم ہوسکتی ہے“۔ دوسری جانب شہریوں نے انتظامیہ کی نااہلی پر شدید ردِعمل دیتے ہوئے مطالبہ کیا ہے کہ ضلعی حکومت نان بائیوں کے من مانے نرخوں کے خلاف فوری کارروائی کرے تاکہ عام عوام کو ریلیف مل سکے۔