افغانستان میں بڑھتی دہشتگردی اور عدم استحکام پر تشویش کے پیش نظر تہران میں افغانستان کے ہمسایہ ممالک کا اہم اجلاس منعقد ہوا، جس میں پاکستان، چین، روس، تاجکستان، ازبکستان اور ترکمانستان کے نمائندوں نے شرکت کی۔
ایرانی میڈیا کے مطابق اجلاس کی صدارت ایرانی وزیر خارجہ عباس عراقچی نے کی۔ اجلاس سے خطاب کرتے ہوئے انہوں نے کہا کہ افغانستان میں سیکیورٹی اور استحکام علاقائی تعاون کے بغیر ممکن نہیں اور افغانستان کے مسائل کا حل صرف ہمسایہ ممالک ہی مل کر نکال سکتے ہیں۔
اجلاس میں پاکستان کی نمائندگی نمائندہ خصوصی برائے افغانستان سفیر محمد صادق نے کی، جنہوں نے خطے کو درپیش سیکیورٹی چیلنجز پر پاکستان کا مؤقف پیش کیا۔
ایرانی میڈیا کے مطابق اجلاس میں شرکت کیلیے طالبان حکومت کو بھی دعوت دی گئی تھی تاہم کابل نے اس دعوت کو قبول نہیں کیا۔
اجلاس میں افغانستان کی صورتحال، سرحد پار دہشتگردی اور علاقائی امن و استحکام سے متعلق امور پر تفصیلی تبادلہ خیال کیا گیا۔