خیبر پختونخوا حکومت نے سوات میں جاری تین پن بجلی منصوبوں میں سست روی پر تشویش کا اظہار کرتے ہوئے ناپسندیدگی کا اظہار کردیا ہے۔ مذکورہ تینوں منصوبوں سے پیداوار کیلیے دو سال کی ڈیڈ لائن مقرر کرتے ہوئے انہیں جلد از جلد شروع کرنے کی سختی سے ہدایت کردی گئی ہے، سیکریٹری توانائی و برقیات نثار احمد نے پیڈو ہاؤس میں پن بجلی کے جاری 7 اہم منصوبوں پر ہونے والی پیش رفت کے حوالے سے جائزہ اجلاس کی صدارت کی۔ سیکریٹری توانائی نے ضلع سوات میں توانائی کے جاری 3 فلیگ شپ منصوبوں پر کام کی سست روی پر سخت برہمی کا اظہار کیا ان منصوبوں سے 330 میگاواٹ بجلی کی پیداوار آئندہ 2 سال میں شروع ہونے کی ڈیڈلائن مقررکی گئی ہے۔ انہوں نے متعلقہ پراجیکٹ ڈائریکٹرز کو خبردار کیا کہ منصوبے مقررہ ڈیڈلائن کے اندر مکمل کریں بصورت دیگر اب کسی بھی قسم کی تاخیر ناقابل برداشت ہوگی۔ انہوں نے پیڈو افسران کو تمام امور ٹیم ورک کے تحت نمٹانے پر زور دیا کیونکہ محکمہ توانائی موجودہ صوبائی حکومت کے گڈ گورننس روڈ میپ کے تحت گین چارٹ کے ذریعے تمام جاری منصوبوں کی روزانہ کی بنیاد پر فزیکل پراگریس مانیٹر کررہا ہے۔ اجلاس میں چیف ایگزیکٹو پیڈو حبیب اللہ شاہ نے بریفنگ دیتے ہوئے بتایا کہ رواں سال 63 میگاواٹ کے تین اہم پن بجلی منصوبے 40.8 میگاواٹ کوٹو دیر، 11.8میگاواٹ کروڑہ شانگلہ اور 10.2 میگاواٹ جبوڑی مانسہرہ کامیابی کے ساتھ مکمل کرلیے گئے ہیں۔ اسی طرح 300 میگاواٹ بالاکوٹ مانسہرہ،157 میگاواٹ مدین سوات، 88 میگاواٹ گبرال کالام، 84 میگاواٹ مٹلتان سوات، 69 میگاواٹ لاوی چترال اور 6.9 میگاواٹ مجاہدین پاور پراجیکٹ تورغر پر ہونے والی پیشرفت کے بارے میں آگاہ کیا۔ اس موقع پر سیکریٹری توانائی نے مٹلتان سے مدین تک 40 کلو میٹر طویل وی ٹرانسمشن لائن منصوبے کو آنے والے دنوں میں انتہائی اہم قرار دیتے ہوئے منصوبے کو آئندہ سال ٹائم فریم میں ہر صورت مکمل کرنے پر زور دیا اور صوبے کے سب سے بڑے منصوبے 300 میگاواٹ بالاکوٹ پر بھی نو تعینات متعلقہ پراجیکٹ ڈائریکٹر کو کام مزید تیز کرنے کی ہدایات جاری کیں۔ اجلاس میں سیکریٹری توانائی نے پیڈو کے انتظامی امور کو مزید شفاف بنانے کے لیے ضروری ہدایات بھی جاری کیں۔