شہدا کے ورثا کے لیے امدادی رقم میں نمایاں اضافے کا اعلان کرتے ہوئے وزیراعلیٰ خیبر پختونخوا سہیل آفریدی نے کہا ہے کہ صوبائی حکومت شہدا کے خاندانوں کے ساتھ کھڑی ہے اور ان کی قربانیوں کا عملی اعتراف کیا جا رہا ہے۔ پشاور میں پاک بھارت جنگ کے دوران شہید ہونے والے فورسز اہلکاروں کے ورثا سے ملاقات کے موقع پر وزیراعلیٰ نے اہم فیصلوں سے آگاہ کیا۔ وزیراعلی نے شہدا کے ورثا امدادی رقم 50 لاکھ روپے سے بڑھا کر ایک کروڑ روپے کرنے کا اعلان کیا، جبکہ زخمی اہلکاروں کیلیے امدادی رقم 10 لاکھ سے بڑھا کر 25 لاکھ روپے مقرر کردی گئی ہے۔ یہ اقدام فورسز اور ان کے خاندانوں کے حوصلے کو بلند کرنے کے لیے کیا گیا ہے۔ وزیراعلیٰ سہیل آفریدی نے کہا کہ خیبر پختونخوا حکومت شہدا کے اہل خانہ کے شانہ بشانہ کھڑی ہے، شہدا قوم کا فخر ہیں اور ان کے ورثا کی کفالت حکومت کی اولین ذمہ داری ہے۔ انہوں نے مزید کہا کہ صوبے کے عوام اور سیکیورٹی فورسز کی قربانیاں ملک و قوم کی سلامتی کی ضمانت ہیں، جنہیں کبھی فراموش نہیں کیا جا سکتا۔