یوکرین کے صدر ولادیمیر زیلنسکی نے کہا ہے کہ ’حقیقت یہ ہے کہ امریکہ کی جانب سے 30 روزہ جنگ بندی کی تجویز پر روس کی جانب سے کوئی ’بامعنی‘ ردِعمل نہیں آیا، اس کا مطلب یہ ہے کہ وہ یوکرین میں لڑائی جاری رکھنا چاہتا ہے۔‘فرانسیسی خبر رساں ایجنسی اے ایف پی کے مطابق صدر ولادیمیر زیلنسکی نے جمعرات کو سوشل میڈیا پر ایک بیان میں کہا کہ ’افسوس، ایک سے زیادہ دن گزرنے کے باوجود دنیا نے تاحال جنگ بندی کی تجویز پر رُوس کا کوئی معنی خیز جواب نہیں سُنا۔‘انہوں نے اس حوالے سے مزید کہا کہ ’یہ ایک بات ایک بار پھر ظاہر کرتی ہے کہ رُوس جنگ کو مزید طُول دینے اور امن کو ہر ممکن حد تک مؤخر کرنا چاہتا کرتا ہے۔‘ولادیمیر زیلنسکی کہتے ہیں کہ ’ہم امید کرتے ہیں کہ امریکی دباؤ یوکرین میں رُوس کو جنگ ختم کرنے پر مجبور کرنے کے لیے کافی ہو گا۔‘واضح رہے کہ اس سے قبل کریملن کے ایک اعلٰی عہدے دار نے جمعرات کو روس اور یوکرین کے درمیان جنگ بندی کے لیے امریکہ اور یوکرین کی تجویز پر تنقید کی تھی اور کہا تھا کہ ’یہ یوکرینی فوج کے لیے ایک طرح سے ’ریلیف‘ ہو گا۔‘یُوری اوشاکوف نے امریکہ کے قومی سلامتی کے مشیر مائیک والٹز سے ٹیلی فونک گفتگو کرنے کے بعد سرکاری میڈیا کو بتایا کہ ’یہ یوکرین کی فوج کے لیے ایک عارضی ریلیف کے سوا کچھ نہیں ہو گا۔‘ان کا کہنا تھا کہ ’صدر ولادیمیر پوتن جمعرات کو اس تجویز کا ’شاید زیادہ مخصوص اور تفصیلی جائزہ لیں گے۔‘رُوس کے اعلٰی عہدے دار نے یہ بھی کہا کہ ان کا ملک ایک ’طویل المدت پُرامن حل‘ کا ہدف رکھتا ہے جو روس کے ’جائز مفادات‘ کے تحفظ کو یقینی بنائے اور ہم اسی کے لیے کوشش کر رہے ہیں۔امریکہ کے مذاکرات کاروں نے جمعرات کو یوکرین میں 30 روزہ جنگ بندی اور اس حوالے سے اپنا منصوبہ پیش کرنے کے لیے رُوس کا دورہ کیا۔واضح رہے کہ امریکہ نے تین برس سے جاری یوکرین کی جنگ میں ’غیر مشروط‘ وقفے کے لیے رُوس پر 30 روز کی جنگ بندی پر زور دیا ہے۔