پاکستان تحریک انصاف کی جانب سے خیبر پختونخوا میں امن جرگہ سے قبل سابق وزرائے اعلیٰ اور گورنرز کے ساتھ الگ بیٹھک کی تجویز سامنے آئی ہے۔ ذرائع کے مطابق وزیر اعلیٰ محمد سہیل آفریدی کی زیرِ صدارت 12 نومبر کو صوبائی اسمبلی میں طلب کیے گئے امن جرگے سے پہلے پی ٹی آئی قیادت نے مشورہ دیا ہے کہ سابق وزرائے اعلیٰ اور گورنرز کو الگ طور پر وزیراعلیٰ ہاؤس میں عشائیہ پر مدعو کیا جائے۔ اس بیٹھک میں صوبے میں قیامِ امن کے حوالے سے ان کی رائے اور سفارشات حاصل کی جائیں گی جنہیں بعد ازاں اسمبلی میں ہونے والے امن جرگے میں پیش کیا جائے گا۔ ذرائع کا کہنا ہے کہ پی ٹی آئی نے تمام سیاسی جماعتوں کے قائدین، بشمول عوامی نیشنل پارٹی اور جمعیت علمائے اسلام کے سربراہان کو بھی شرکت کی دعوت دینے کا فیصلہ کیا ہے۔ ذرائع کے مطابق سابق وزرائے اعلیٰ اور گورنرز کی تجاویز کو حتمی اعلامیے کا حصہ بنا کر تمام جماعتوں کے مشترکہ لائحہ عمل کی صورت میں وفاقی حکومت کے سامنے پیش کیا جائے گا۔