وزیر دفاع خواجہ آصف نے قومی اسمبلی میں مولانا فضل الرحمان کی گزشتہ روز کی تقریر کا جواب دیتے ہوئے کہا ہے کہ تہران میں کوئی دفاعی معاہدہ نہیں ہو رہا تھا اور نہ ہی وہاں پاکستان کے دفاع کی بات ہو رہی تھی، اس لیے وہاں ان کی موجودگی ضروری نہیں تھی۔ انہوں نے وضاحت کی کہ تہران میں جو کچھ ہو رہا تھا وہ وزارت دفاع کے مینڈیٹ میں شامل نہیں تھا، تاہم حالیہ دنوں میں ہونے والے دیگر دفاعی معاہدوں میں وہ بطور وزیر دفاع شریک رہے ہیں۔ خواجہ آصف کا کہنا تھا کہ فیلڈ مارشل صلح کے پیامبر بن کر تہران گئے تھے اور انہوں نے وہاں ایک جنگ رکوائی، کیونکہ یمن کا تنازع بگڑ سکتا تھا۔ انہوں نے زور دیا کہ بین الاقوامی سطح پر پاکستان اور فیلڈ مارشل کے امن کا کردار تسلیم کیا جانا چاہیے، اور امید ظاہر کی کہ آنے والے دنوں میں مشرق وسطیٰ میں اس کے مثبت نتائج سامنے آئیں گے۔ مولانا فضل الرحمان کی تنقید کا جواب دیتے ہوئے وزیر دفاع نے کہا کہ مولانا فضل الرحمان کو بھی کچھ شرم اور حیا کرنی چاہیے کیونکہ وہ 40 سال مختلف عہدوں پر رہے ہیں۔ انہوں نے سوال اٹھایا کہ مولانا 10 سال تک کشمیر کمیٹی کے چیئرمین رہے، وہ بتائیں کہ انہوں نے اس دوران کیا خدمات سرانجام دیں۔ خواجہ آصف نے مزید کہا کہ مولانا کا ماضی تضادات سے بھرا ہوا ہے اور یہاں کوئی بھی آبِ زم زم سے دھلا ہوا نہیں ہے۔ انہوں نے مولانا فضل الرحمان کے دورہ افغانستان پر بھی سوال اٹھاتے ہوئے کہا کہ وہ بتائیں کہ انہوں نے افغانستان کا دورہ کیوں کیا اور وہاں جانے کی پیشکش کیوں کی؟ جبکہ وہ وزیر خارجہ بھی نہیں تھے، ان کے اس دورے کا مقصد صرف اپنی سیاست کو آگے بڑھانا تھا۔