پاکستان کے وزیر دفاع خواجہ محمد آصف نے کہا ہے کہ پاکستان کی فضائیہ نے پانچ انڈین طیارے مار گرائے ہیں۔بلومبرگ کو دیے گئے انٹرویو میں ننھوں نے کہا کہ پاکستان نے لائن آف کنٹرول پر دو چیک پوسٹس تباہ کی ہیں۔انھوں نے کہا کہ انڈیا نے پاکستان اور اس کے زیر انتظام کشمیر میں سات مقامات پر حملہ کیا ہے۔ اس سے قبل پاکستان کے وزیراطلاعات عطا تارڑ نے بھی کہا تھا کہ پاکستانی فضائیہ نے اب تک انڈیا کے پانچ طیارے مار گرائے ہیں۔  عطا تارڑ نے جیو نیوز کو بتایا کہ اب تک پاکستان پانچ انڈین لڑاکا طیارے اور ایک بڑا ڈرون مار گرایا ہے۔ وزیراطلاعات نے کہا کہ پاکستان پوری طرح تیار تھا اس لیے انڈیا کو فوری جواب دے دیا۔قبل ازیں پاکستانی فوج کے ترجمان لیفٹننٹ جنرل احمد شریف چوہدری نے کہا کہ پاکستان نے انڈین فضائیہ کے دو طیارے مار گرائے ہیں۔ڈی جی آئی ایس پی آر نے امریکی ٹیلی ویژن سی این این کو بتایا کہ ’انڈین فضائیہ کے دو طیارے مار گرائے جانے کی تصدیق ہو چکی ہے۔‘دوسری جانب لیفٹیننٹ جنرل احمد شریف چوہدری نے سی این این کے جم سکیوٹو کو بتایا کہ ’دیگر اطلاعات بھی ہیں جن کے مطابق پاکستانی زمینی اور فضائی افواج نے مزید نقصانات پہنچائے ہیں، لیکن میں اس بات کی تصدیق کر سکتا ہوں کہ انڈین فضائیہ کے کم از کم دو طیارے مار گرائے گئے ہیں۔‘سی این این کے مطابق انڈین فضائیہ سے موقف لینے کے لیے رابطہ کیا گیا ہے تاہم ابھی تک کوئی جواب نہیں آیا ہے۔خیال رہے طیارے مار گرانے کے حوالے سے انڈیا کا ابھی تک کوئی موقف سامنے نہیں آیا ہے۔