سرکاری ٹی وی کے مطابق پاکستان نے انڈیا کے حملوں کے جواب میں آپریشن ’بنیان مرصوص‘ کا آغاز کردیا ہے۔ پاکستان نے ’فتح ون‘ میزائل کے ذریعے انڈیا میں اہداف کو نشانہ بنایا۔سکیورٹی ذرائع کے مطابق آپریشن ’بنیان مرصوص‘ کے تحت انڈیا میں متعدد جگہوں پر حملے کیے جا رہے ہیں۔ انڈین علاقے بیاس میں ’براہموس میزائل‘ کی سائٹ تباہ کردی گئی ہے۔مزید بتایا گیا ہے کہ ’پاکستان کی جوابی کارروائی کے دوران ادھم پور ایئربیس اور پٹھان کوٹ میں ایئر فیلڈ کو بھی تباہ کر دیا گیا ہے۔‘’آپریشن ’بنیان مرصوص‘ میں اُن تمام بیسز کو ٹارگٹ کیا جا رہا ہے جہاں سے پاکستان کے عوام اور مساجد پر حملے کیے گئے۔‘سکیورٹی ذرائع کا کہنا ہے کہ سنیچر کو پاکستان کی جانب سے انڈیا کے مختلف علاقوں میں اہم فوجی تنصیبات کو نشانہ بنایا گیا۔’انٹیلی جنس اور فیلڈ رپورٹس کے مطابق ان حملوں میں بڑے پیمانے پر تباہی ہوئی ہے جبکہ انڈیا کے کئی فوجی ہلاک اور زخمی بھی ہوئے ہیں۔‘‏سکیورٹی ذرائع کے مطابق پاکستانی حملے کے دوران بیاس میں براہموس میزائل سٹوریج تباہ جبکہ ادھم پور ایئر ڈیفنس سسٹم اور ایئر بیس کو شدید نقصان پہنچا۔’پٹھان کوٹ ایئر فیلڈ، جالندھر،گجرات اور راجستھان کے فوجی اڈوں پر حملے کیے گئے جبکہ نئی دہلی پر فائر کیا گیا میزائل حصار (ہریانہ) کے قریب روکا گیا۔‘سکیورٹی ذرائع کا مزید کہنا ہے کہ ’سری نگر ایئر بیس پر حملے میں 20 انڈین فوجی ہلاک ہوگئے ہیں جبکہ چندی گڑھ میں ہتھیاروں کا ڈپو تباہ کردیا گیا ہے۔‘اس سے قبل افواج پاکستان کے ترجمان لیفٹیننٹ جنرل احمد شریف چوہدری نے کہا ہے کہ ’انڈیا نے نور خان ایئربیس راولپنڈی، شور کوٹ بیس اور مرید بیس پر میزائل داغے ہیں۔جمعے اور سنیچر کی درمیانی رات میڈیا بریفنگ میں انہوں نے بتایا کہ ’انڈیا نے فضا سے زمین پر مار کرنے والے میزائلوں کے ذریعے پاکستانی بیسز کو نشانہ بنایا۔‘لیفٹیننٹ جنرل احمد شریف چوہدری کا کہنا تھا کہ ’پاکستان کے ایئر ڈیفنس سسٹم نے ان میں سے بیشتر میزائلوں کو ہدف پر پہنچنے سے قبل ہی تباہ کردیا۔‘’پاکستانی فضائیہ کے تمام اثاثے محفوظ ہیں۔ ان بزدلانہ اقدامات سے مرعوب نہیں ہوں گے، انڈیا ہمارے جواب کا انتظار کرے۔‘انہوں نے یہ بھی بتایا کہ ’انڈیا نے افغانستان پر بھی میزائل داغے ہیں۔ انڈیا اپنے پاگل پن سے پورے خطے کو جنگ کی طرف دھکیل رہا ہے۔‘’انڈیا نے 6 بیلسٹک میزائل فائر کیے ہیں، ایک آدم پور 5 امرتسر میں گرے‘ڈی جی آئی ایس پی آر نے نیوز بریفنگ میں یہ بھی بتایا تھا کہ ’انڈیا نے 6 بیلسٹک میزائل فائر کیے ہیں جن میں سے پانچ امرتسر اور ایک آدم پور میں گرا۔‘جمعے اور سنیچر کی درمیانی رات میڈیا بریفنگ میں انہوں نے بتایا کہ ’انڈیا نے یہ چھ بیلسٹک میزائل آدم پور سے فائر کیے۔‘لیفٹیننٹ جنرل احمد شریف چوہدری کا کہنا تھا کہ ’انڈیا نے اپنے ہی ملک کی حدود میں میزائل گرا دیے ہیں، انڈیا سکھوں کی آبادیوں کو ٹارگٹ کر رہا ہے۔‘’انڈیا کی اندرونی سازشوں کا شکار اقلیتی مذاہب ہو رہے ہیں، پاکستان کی تمام ہمدردیاں سکھوں اور اقلیتوں کے ساتھ ہیں۔‘سکھوں کو بیلسٹک میزائل کے ذریعے ہدف بنانا انڈیا کی گہری سازش ہے: عطا تارڑپاکستان کے وزیر اطلاعات عطا اللہ تارڑ کا کہنا ہے کہ ’اپنے ہی سکھ شہریوں کو بیلسٹک میزائل کے ذریعے ہدف بنانا انڈیا کی اپنی اقلیتوں کے خلاف گہری سازش ہے۔‘جمعے اور سنیچر کی درمیانی رات ’ایکس‘ پر ایک بیان میں انہوں نے کہا کہ ’پاکستان اس مشکل وقت میں سکھ کمیونٹی کے ساتھ کھڑا ہے۔‘وزیر اطلاعات کے مطابق ’اس قسم کے بُزدلانہ اقدامات دنیا کے سامنے انڈیا کا حقیقی چہرہ بے نقاب کر رہے ہیں۔ کیا شرمناک حرکت ہے۔‘