پاکستان سپر لیگ کی فرینچائز پشاور زلمی نے انڈیا کے خلاف ’دلیرانہ ردعمل‘ کا مظاہرہ کرنے والے پاکستانی پائلٹس کے لیے پانچ کروڑ روپے انعام کا اعلان کیا ہے۔عرب نیوز کے مطابق اتوار کو پشاور زلمی کی انتظامیہ کی جانب سے اقدام کو ’قومی یکجہتی کا اشارہ‘ قرار دیا گیا ہے۔یہ اعلان پاکستان کے یوم تشکر کے روز سامنے آیا جس کا اعلان وزیراعظم شہباز شریف نے یہ کہتے ہوئے کیا تھا کہ ’فوجی جوانوں نے انڈیا کو مناسب جواب دیا۔‘بدھ کو انڈیا کی جانب سے پاکستان کے مختلف شہروں پر حملے کیے گئے جس کے بعد پاکستان نے کہا تھا کہ اس نے انڈیا کے پانچ جنگی طیارے مار گرائے ہیں جس کی جزوی طور پر تصدیق انڈین حکومت کے ذرائع نے بھی کی اور کم سے کم تین جہازوں کو تسلیم کیا۔پشاور زلمی کے چیئرمین جاوید آفریدی نے کہا کہ حالیہ واقعات سے قومی سلامتی اور عام شہریوں کے تحفظ کو شدید خطرات لاحق ہوئے مگر پاکستان کے فضائی محافظوں کے ’تیز، درست اور دلیرانہ ردعمل‘ نے کسی بھی بڑے نقصان کو ٹال دیا۔ان کے مطابق ’ان کی غیرمتزلزل ہمت، لگن اور قربانی ہمارا قومی فخر ہے۔ آج ہم صرف الفاظ میں ہی ان کی عزت نہیں کرتے بلکہ بامعنی عمل سے بھی سراہتے ہیں۔‘ان کا مزید کہنا تھا کہ ’ان کا یہ کردار قومی سالمیت کا مضبوط نشان ہے اور ہم اپنے ان ہیروز کا احترام کرتے ہیں جو غیرمتزلزل عزم کے ساتھ ہمارے آسمانوں کی حفاظت کرتے ہیں۔‘یہ اعلان امریکہ کی ثالثی میں ہونے والی جنگ بندی کے بعد سامنے آیا ہے۔دو جوہری پڑوسیوں کے درمیان چار روز تک جاری رہنے والی جنگ میں تقریباً 60 افراد ہلاک ہوئے اور ہزاروں کی تعداد میں لوگوں کو نقل مکانی کرنا پڑی۔انڈیا اور پاکستان کے درمیان شدید تناؤ کی وجہ سے دونوں ملکوں نے ہی اپنی ٹی20 لیگز کو ملتوی کر دیا ہے۔دونوں ممالک کے کرکٹ حکام باقی ماندہ میچز کے مقامات اور تاریخوں کے حوالے سے مشاورت کر رہے ہیں۔