وزیراعلیٰ پنجاب مریم نوازشریف نے صوبے میں چکن کی قیمتوں میں اضافے پر شدید برہمی کا اظہار کرتے ہوئے متعلقہ اداروں کو فوری اقدامات کرنے کی ہدایت جاری کر دی ہے۔ یہ احکامات انہوں نے ایک اعلیٰ سطحی اجلاس کے دوران دیے، جس میں صوبے میں اشیائے خورونوش، خاص طور پر سبزیوں اور دالوں کی قیمتوں کا جائزہ لیا گیا۔ مریم نواز نے کہا کہ عیدالاضحیٰ سے قبل ٹماٹر، پیاز، ادرک، لہسن، مرچ اور لیموں جیسے بنیادی اجناس کی قیمتوں میں اضافہ کسی صورت برداشت نہیں کیا جائے گا۔وزیراعلیٰ نے واضح ہدایت کی کہ ذخیرہ اندوزی کے ذریعے قیمتیں بڑھانے والوں کے خلاف سخت کارروائی کی جائے۔ انہوں نے کہا کہ جب حکومتی ادارے موجود ہیں تو پھر چکن کی قیمتوں میں بے قابو اضافہ ناقابل قبول ہے۔اجلاس میں آٹے کی قیمت میں کمی کے بعد روٹی سستی کرنے کے لیے بھی فوری حکمت عملی مرتب کرنے کی ہدایت کی گئی۔ وزیراعلیٰ نے سبزیوں کی نقل و حمل کے اخراجات کم کرنے کے لیے منصوبہ طلب کیا ہے، تاکہ عام آدمی پر مہنگائی کا بوجھ کم ہو سکے۔مزید برآں، انہوں نے محکمہ زراعت کو ہدایت کی کہ بے موسمی سبزیاں اگانے کے لیے ضروری اقدامات کیے جائیں تاکہ سال بھر رسد میں تسلسل برقرار رکھا جا سکے۔