"ناگن ڈرامہ جوڑی لگ رہے ہیں!" "بلیو لینسز والا لڑکا بالکل چپری لگ رہا ہے۔" "بارات پر ریڈ لینسز بھی لگا لینا اب!" سوشل میڈیا پر ان دنوں حسین ترین اور رابعہ خان کی شادی کی تقریبات خوب توجہ حاصل کر رہی ہیں، مگر سب کی باتیں صرف خوشی کی نہیں بلکہ حسین ترین کے مہندی والے انداز پر تنقید کا طوفان بھی برپا ہے۔ ٹک ٹاک اور انسٹاگرام پر مشہور یہ جوڑی مہندی اور قوالی نائٹ پر آئس بلیو رنگ کے میچنگ لباس میں نظر آئی۔ حسین ترین نے اپنے ملبوسات کے ساتھ نیلے رنگ کے کانٹیکٹ لینسز بھی پہن رکھے تھے، جو ان کے پورے گیٹ اپ میں سب سے زیادہ نمایاں ہو رہے تھے۔ ان کی یہ فیشن چوائس جہاں کچھ لوگوں کو منفرد لگی، وہیں بہت سوں کو خاصی عجیب بھی محسوس ہوئی۔ دونوں نے اپنی مہندی کے دن کے لیے کشیز بوتیک کا انتخاب کیا، جبکہ رابعہ خان نے اپنی جیولری بھی وہیں سے حاصل کی۔ مگر حسین کی نیلی آنکھیں سب پر بازی لے گئیں اور سوشل میڈیا صارفین نے اس پر خوب تبصرے کیے۔ جہاں ایک طرف لوگ ان کی جوڑی کو سراہ رہے ہیں، وہیں حسین ترین کے اسٹائل پر ہونے والی تنقید نے ایک الگ بحث چھیڑ دی ہے۔ کچھ لوگوں کا کہنا ہے کہ شادی جیسے موقع پر قدرتی انداز ہی بہتر ہوتا ہے، اور اس طرح کے غیرمعمولی تجربے شاید میلے میں تو چل جائیں، مگر زندگی کے خاص لمحوں کو متاثر کر سکتے ہیں۔ سوشل میڈیا کے اس دور میں جہاں ہر لمحہ کیمرے میں قید ہوتا ہے، وہیں ہر فیشن انتخاب بھی تبصرے اور تجزیے کی زد میں ہوتا ہے اور حسین ترین اس کا تازہ شکار بنے ہیں۔